Vijon që të jetë mjaft e tensionuar situata mes palëve politike në vendin tonë, ku tashmë duket se përplasja e brinjëve do të bëhet mes Ramës dhe Metës.
Nga një takim elektoral në Himarë, Rama vijoi me thumbet ndaj Metës, duke thënë se ai ka disa ditë që nuk fle gjumë dhe ha paçe me Fahri Balliun.
“Ai nuk është se u zgjua në 5 të mëngjesit dhe më priste mua në takim, ai nuk ka fjetur fare, ai ha pace me Fahri Balliun, kafen turke mere kokërr këto ditë, deri të dielën, 30 Qershori është aty dhe është i popullit”, u shpreh Rama.
Ndërkohë që presidenti i është përgjigjur me një tjetër video provokuese të zgjedhjeve në kohën e komunizmit. Meta e quan këtë fundjavë në të cilën po hyjmë interesante, dhe fton qytetarët që të shmangin përplasjet mes tyre.
Postimi i Metës;
Mirëdita të dashur qytetarë!
Nga dje, data kushtetuese e zgjedhjeve vendore është 13 tetor 2019.
Situata është e qartë dhe e padiskutueshme nga ana ligjore dhe kushtetuese.
Gjithsesi kryeministri po insiston për të shkuar në votime socialiste në datën 30 qershor 2019.
Ju këshilloj ta merrni atë me qetësi e mençuri, dhe të mos bini pre e provokimeve, sepse ato u shërbejnë vetëm atyre që duan të legjitimojnë kapjen totale të shtetit dhe instalimin e një regjimi njëpartiak.
Të dashur qytetarë,
T’i respektojmë dhe të mos konfrontohemi me të gjithë ata bashkëqytetarë që do të shkojnë në këto votime socialiste.
Konfrontimi dhe dhuna nuk i shërben Shqipërisë dhe së ardhmes së saj europiane, dhe sidomos bashkëjetesës sonë qytetare në çdo familje, në çdo lagje, në çdo fshat, në çdo komunitet dhe në të gjithë shoqërinë tonë.
Mos u nervozoni nga provokimet që do t’ju bëhen për t’ju çuar drejt dhunës.
Ndoshta e teproj, por për t’i shijuar tamam votimet socialiste dhe për t’ju rikthyer qoftë dhe për 1 ditë asaj periudhë 45-vjeçare, shoqërojini me dajre e daulle si njëherë e një kohë.
Ata vetë do votojnë, vetë do t’i numërojnë.
Të gjithë shqiptarët së bashku, në mënyrë demokratike, të fshehtë, të lirë dhe të ndershme do të zgjedhin vetëm në 13 tetor 2019.
Ndaj ju ftoj të ndiqni dhe këtë video për t’u çtensionuar sadopak në prag të kësaj fundjave interesante.
(E.K/Faxweb.al)
