Protesta e studentëve, në ditën e dytë të saj para Ministrisë së Arsimit, ku kërkojnë uljen e tarifave të studimit, ku sot pika 4 e Vendimit të Këshillit të Ministrave, e cila parashikonte pagesë shtesë për provimet e mbartura u shfuqizua zyrtarisht.
Pedagogu dhe aktivisti i lëvizjes “Për Universitetin”, Redi Muçi, ishte i ftuar në studion e televizionit “Fax News”, ku foli lidhur me protestën dhe problemet që studentët hasin gjatë jetës së tyre studentore.
Ai bëri me dije se “Këmbëngulja e studentëve do të vijojë. Nuk janë vetëm tarifat, por gjendja e Universitetit lë për të dëshiruar. Buxheti i Universiteti është i pamjaftueshëm.
Tarifat janë shumë të larta e të pa përballueshme”.
Sipas tij, “Qëndrimi i ministrisë apo qeverisë në përgjithësisë, ka qenë thjeshtë heshtje e injorim. Kryeministri ka reaguar duke i quajtur studentët ngelsa e katranjosa që po bëjnë zhurmë.
Tarifat janë një zgjidhje e parë nga Universiteti për të plotësuar nevojat. Kjo vjen për shkak të buxhetit të ulët të parashikuar nga shteti për Universitetin. Në të tilla kushte Universitetet drejtohen ndaj tarifave për studentët”.
Ndërsa u ndal tek proklamimi i Ministrisë së Arsimit dhe qeverisë, se po rritet cilësia e arsimit, ai u shpreh se, “Përderisa po kërkojnë para nga studentët, bie poshtë justifikimi i tyre për cilësinë e universitetit”.
Më tej ai u shpreh se studentët nuk janë të përfaqësuar në Universitet, ndërsa paralajmëroi për mundësinë e krijimit të një grupimi që do të përfaqësojë studentët.
“Studentët nuk janë fare të përfaqësuar në Universitet. Studentët duhet të kenë një strukturë që të përfaqësohen. Duhet të kenë një strukturë që t’i përfaqësojë edhe në Dekant, Sekretariat e tj. Për fat të keq janë vetëm sindikatat që mund t’i përfaqësojnë sot.
Nga lëvizje masive të tilla, ekziston gjithmonë mundësia që të lindin grupime të ndryshme, në përkrahje të studentit, të përfaqësojnë e të jenë zëri i tyre. Kjo do të jetë edhe fitorja më e madhe nga kjo protestë”, deklaroi Muçi.
Ndërsa u ndal tek vetëfinancimi i universiteteve, Muçi tha: “Ligji që ka kaluar, tregon se është qeveria ajo që vendos një tavan për tarifat e universitet, e kështu të gjitha universitetet tentojnë tavanin, për shkak të mungesës së financimit nga shteti. Nëse qeveria do të rrisë buxhetin, atëherë edhe kjo tarifë do të ulej, e kështu do të zgjidhej edhe problematika. Sot cilësia e Universitetit jo vetëm që nuk është përmirësuar, por përkundrazi”.
Sipas tij, “Nuk mund të presim që qeveria të vihet në pozitë, të vihet në faj që të reagojë, por vetëm këmbëngulja e studentëve, si kjo e dy ditëve të fundit do të sjellë zgjidhjen e problemeve. I rëndësishëm është fakti se studentët kanë arritur të mposhtin frikën nga politika, frikën nga pedagogu, e kjo është shumë pozitive. Kjo është shpresa se gjërat do të ndryshojnë”.
Ai u dha përgjigje edhe zërave që e lidhin këtë protestë dhe lëvizjen “Për Universitetin” me ndonjë forcë të caktuar politike, ku tha se: “Lëvizja “Për Universitetin” është diçka spontane, që s’ka të bëjë me asnjë përfaqësi partiake. Por kur gjithmonë ka një organizim të tillë ka edhe aludime të flasin për politikë. Por kjo nuk është e vërtetë. Gjithçka ishte spontane”.
Pedagogu Muçi, u ndal edhe tek termi i përdorur nga kryeministri Rama si “ngelës” për studentët protestues, ku tha se ai është termi më denigrues i përdorur, ndërsa e krahasoi atë edhe me termin e përdorur nga Erion Veliaj ndaj protestuesve të “Unazës së Re”, si ‘shpellarë’ apo edhe ai i përdorur më herët nga ish-kryeparlamentari, sot President i Republikës Ilir Meta.
“Termi ngelës, i përdorur nga Kryeministri është termi më denigruaes, për faktin e thjeshtë se nëse do të vëmë re vetëm sakrificat e studentëve sot janë të tepruara. Ata janë të drobitur, punojnë nëpër call centera, e njëkohësisht studiojnë. Pra ata nuk japin të gjithë atë që munden në studime, për shkak se detyrohen të punojnë. Edhe termi i përdorur nga kryebashkiaku si shpellarë apo edhe Presidenti i sotëm kur dikur thoshte kokëpalarë, janë shumë denigrues, por kjo e përdorura nga Kryeministri është më denigruesi ndër të gjithë”, – tha Muçi.
(B.B/ Faxweb.al)
