Drejtuesi i Prokurorisë së Krimeve të Rënda, Besim Hajdarmataj, ka folur për herë të parë publikisht për çështjen e ekstradimit të Nazer Seitajt në Itali, i njohur ndryshe si financieri i grupit të Habilajve.
Nazer Seiti mbahej në burg pasi u arrestua në operacionin e Babicës ku u kapën 4 tonë drogë.
Në një prononcim për “Panorama”, Hajdarmataj është shprehur se ekstradimi nuk duhet të ndodhte, dhe se lidhur me këtë çështje Krimet e Rënda kanë bërë verifikimet e tyre dhe ka rezultuar se vendimet e Gjykatës janë dorëzuar në ambientet e burgut ku ndodhej personi.
“Jemi në një fazë analize të rastit, si nga Krimet e Rënda, ashtu edhe nga Prokuroria e Përgjithshme dhe më vonë do të kemi një qëndrim lidhur me këtë çështje.
Nga verifikimet që kemi bërë ne si Prokurori e Krimeve të Rënda, rezulton se të dyja vendimet e Gjykatës së Krimeve të Rënda kanë qenë të depozituara në burgun ku gjendej personi në fjalë.
Sigurisht, që ai nuk mund të ekstradohej, por për këtë çështje do të kemi një qëndrim të mëvonshëm, pasi të përfundojë analiza”, tha Hajdarmataj.
(F.G/Faxweb)
