Komisioni i Pavarur i Kualifikimit ka kërkuar ndjekje penale për ish-anëtarin e Gjykatës Kushtetuese, Besnik Imeraj i cili kishte dhënë dorëheqje më 31 janar të këtij viti.
“Komisioni i Pavarur i Kualifikimit njofton se, në bazë të nenit 281 të Kodit të Procedurës Penale, ka referuar pranë Zyrës së Prokurores së Përgjithshme të gjithë dokumentacionin që rezultoi nga hetimi administrativ gjatë procesit të rivlerësimit të ish-gjyqtarit të Gjykatës Kushtetuese, zotit Besnik Imeraj”, njoftoi KPK.
Por kush është Besnik Imeraj?
Besnik Imeraj ka gjykuar disa nga çështjet më të bujshme në Shqipëri. Imeraj ka patur në dorë çështjen e rrugës Durrës-Kukës, ku ishte i përfshirë kryetari i opozitës Lulzim Basha, në atë kohë ministër i Transporteve i cili akuzohej për shpërdorim detyre.
Një tjetër çështje të rëndësishme që ka gjykuar Besnik Imeraj është video-skandali mes Ilir Metës dhe të ndjerit Dritan Prifti, ish-ministër i Energjitikës.
Përveç kësaj Besnik Imeraj është është një ndër gjykatësit që votoi pro shfuqizimit të vetting-ut, edhe pse Komisioni i Venecias e kishte dhënë miratimin.
Besnik Imeraj ka dhënë dorëheqjen për arsye personale. Imeraj ishte ndër të parët në listën e anëtarëve të Gjykatës Kushtetuese që do të thirrej nga organet e vettingut.
Rasti i tij është i ngjashëm me atë të kryeprokurorit Adriatik Llalla, i cili edhe pse kishte të drejtë të kthehej në sistemin e drejtësisë, ai zgjodhi të largohej.
(B.H/Faxweb)
Discussion about this post