Mëngjesin e kësaj të shtune u bë i ditur zbulimi i një tjetër laboratori droge, i ngritur në katin e dytë dhe të tretë të një vile 3-katëshe në lagjen “Kastriot” të qytetit të Fierit.
Vila që shërbente për kultivimin, tharjen e bimëve narkotike, mësohet se është në pronësi të shtetasit Piro Bare. Ai njihet në Fier si biznesmen që ka në pronësi disa aktivitete fitimprurëse.
I njohur ndër të tjera si biznesmen hidrokarburesh, emri i tij u lakua më së shumti rreth tri vite më parë, kur ai u dyshua se ishte objektivi i një atentati që po përgatitej më 25 janar të 2014-ës nga Julian Sinanaj, i cili akuzoi në atë kohë Ilir Karçinin si porositës të asaj ngjarje.
Atëherë ai rrëfente se si rivali i tij në biznes, preu foton ku kishin dalë bashkë në Milano dhe ia dha Sinanajt për ta vrarë.
Piro Bare rezulton se është pronari i vilës 3-katëshe ku kultivohej drogë, e cila doli zbuluar pas faturës së kripur të energjisë elektrike. Nuk dihet nëse ai ka pasur dijeni për aktivitetin e qiramarrësit me iniciale E. F. i cili është shpallur në kërkim nga policia.
Tetë persona u vunë në pranga për këtë aktivitet kriminal, ndër ta 6 burra dhe 2 gra. Mes të arrestuarve ishin edhe dy punonjës të OSHEE-së.
(XH.A/SHUPLAKA)
(Vila në pronësi të Piro Bare ku u gjet laboratori i drogës)
