Është arrestuar ditën e sotme autori i dyshuar i vrasjes së biznesmenit Memli Begalla, Denis Demiri, i njohur ndryshe edhe si Alban Demiri.
Demiri është arrestuar paraditen e sotme në një lokal tek materniteti “Koço Gliozheni”, i shoqëruar me 3 persona të tjerë, dhe ata me precedentë të mëparshëm penalë.
Policia bën me dije se 37-vjeçari mbahej prej mëse një jave në vëzhgim nga Policia.
Në momentin e arrestimit Demirit iu gjet në brez një pistoletë tip “TT” me Nr. 8/276-1943, me një krehër me 7 fishekë dhe një në fole.
Ngjarja e vitit 2012
Në vitin 2012, shtetasi Demiri është arrestuar pas një konflikti me armë, pasi dyshohej se ai ishte gati të kryente një tjetër vrasje. Në vitin 2013, Demiri u arrestua për vrasje të mbetur në tentativë, vjedhje dhe armëmbajtje pa leje.
“Arrestimi u bë mbi bazën e informacioneve të besueshme se ky shtetas po përgatitej të kryente vrasjen e shtetasit F. A., banues në Kinostudio, Tiranë, pas një sherri për motive xhelozie të ndodhur ndërmjet tyre disa ditë më parë. Konkretisht, shtetasi Denis (Alban) Demiri u kap rreth orës 22:00 të së dielës me një armë zjarri në brez, të mbushur me fishekë gati për qitje, ndërsa arrestimi i tij u krye rreth orës 02:00”, thuhet në njoftimin për ngjarjen e vitit 2012.
(F.G/Faxweb.al)
