Drejtori i ri i Burgjeve nuk është një emër i panjohur. Arjan Hoxha, i cili më parë ka mbajtur postin e Shefit të Antikrimit Financiar është njëri prej disa të liruarve nga detyra pas ardhjes në pushtet të qeverisë Rama.
Sipas Taulant Ballës, ai në vitin 1999 ka falsifikuar dokumentet e diplomimit. “S’kam pasur asnjëherë masë disiplinore, por veç vlerësime, shpërblime. Shkarkimi im dhe i strukturës sime është hakmarrje personale dhe politike. Nga Ardian Çipa kam marrë vlerësimin shkëlqyer.
Sot kam marrë vërtetimin tek akademia, j’ua vë në dispozicion, kërkoj nga deputetët të kërkojnë ndjesë”, dëshmonte në 2014-ën Hoxha.
“Nuk kemi kërkuar këtë listë notash, por të vitit 1999, e cila është falsifikuar. Ne kemi depozituar provën për falsifikim dhe tashmë j’u duhet një avokat.”, i kundërpërgjigjej Balla.
Partia Socialiste vuri në dispozicion disa dokumente, ku sipas tyre rezultonte se në vitin 1999 kishte falsifikuar firmën e Luan Veliqotit ku paraqitej edhe lista e notave të Arjan Hoxhës. Po sipas këtyre dokumenteve, pas përfundimit të ekspertizës nga ana e Dritan Zotos, theksohej se “Nënshkrimi në emër të Prof.As.Dr. Luan Veliqotit, plotësuar poshtë rubrikës “DREJTORI” në dokumentin “LISTËNOTASH” në datën 25.07.1999 në emër të Arjan Xhevit Hoxhës të Akademisë Rendit Publik, objekt ekspertimi, nuk ishte shkruar nga Luan Veliqoti”.
Në vetë deklaratat e tij në 2014-ën, Hoxha shprehej se shkarkimi i tij erdhi pas arrestimit të Bashkimit Tahirit, babait të Saimir Tahirit, tashmë ish-ministër i Punëve të Brendshme: “Kam qenë shefi i Antikrimit Financiar. Në një nga aksionet u ndalua Bashkim Tahiri. Saimir Tahiri më tha lutu që të mos marr pushtetin. Efektivët që morën pjesë në atë aksion, u liruan. Disa efektivë të tjerë u lëvizën nga detyra. Disa nga kolegët i janë drejtuar Gjykatës.”
(XH.A/SHUPLAKA)
Discussion about this post