Elisabeta Imeraj është komanduar në krye të Prokurorisë së Tiranës nga kryeprokurorja e Përgjithshme, Arta Marku pas shkarkimit të Dritan Rreshkaj nga Komisioni i Pavarur i Kualifikimit pasi nuk justifikonte pasurinë e tij.
Ndërkohë që prokurori Genc Qana edhe pse u përfol në media se do të merrte drejtimin e Prokurorisë së Tiranësm mësohet se nuk e ka pranuar këtë detyrë.
Elisabeta Imeraj nuk është një emër i panjohur për publikun. Ajo ka hetuar disa nga çështjet më të nxehta në vend, përfshirë edhe dosjen për ish-ministrin e Brendshëm Saimir Tahiri për të cilin kërkonte heqjen e imunitetit për ta arrestuar.
Ishte maxhoranca ajo ai që pengoi në Komisionin e Mandateve arrestimin e ish-ministrit të Brendshëm të akuzuar nga Prokuroria për trafikun e drogës.
Dosja Tahiri nuk është e vetmja e bujshme që ka hetuar Imeraj. Ajo ka hetuar dosje të tjera të bujshme si ajo e Shullazit, Orest Sotës, të cilit iu gjetën 863 mijë euro në makinë, që sipas prokurorisë nuk justifikoheshin dhe kishin si adresë ish-ministrin Saimir Tahiri, dosjen e 9 imamëve të cilët janë dënuar për terrorizëm por edhe grupin e trafikantit ndërkombëtar të drogës Met Kananit, i njohur si ‘Eskobari shqiptar’.
Prokurorja Imeraj ka nisur punë si prokurore në Prokurorinë e Rrethit Gjyqësor Shkodër në vitin 2004, më vonë është emëruar në prokurorinë pranë Gjykatës për Krimet e Rënda.
Imeraj, nëna e dy fëmijëve, është diplomuar për drejtësi në vitin 2001 në Fakultetin e Drejtësisë e më pas ka përfunduar Shkollën e Magjistraturës në vitin 2004. (B.H/Faxweb)
(B.H/Faxweb)
Discussion about this post