Një ndër emrat e propozuar nga Partia demokratike si ministër teknik është edhe Gazment Bardhi. Këshillari ligjor 31-vjeçar nga Kavaja, pritet të zërë vendin e Petrit Vasilit në Ministrinë e Drejtësisë.
Bardhi i cili ka lindur më 6 Korrik në vitin 1986, ka përfunduar studimet në vitin 2008 në Universitetin e Tiranës, për Drejtësi.
Ai ka punuar si këshilltar ligjor pranë Kuvendit të Shqipërisë si dhe pranë komisionit të posaçëm parlamentar për reformën në drejtësi.
Përveç kësaj, për një periudhë disa mujore në vitin 2012 kur ministër Drejtësie ishte Eduart Halimi, ai ka qenë këshilltar i tij.
Ndërkohë, ish-ministri i Drejtësisë Ylli Manjani, ka shprehur vlerësimin e tij për ministrin e propozuar, duke e cilësuar si një jurist të zotin.
“E krijuam edhe një risi: qeverinë politeknike. Nuk i njoh të tjerët, por Ministri i Drejtësisë është jurist i zoti! Suksese Gazmend Bardhit!”, shkruan Manjani në twitter.
Gazmend Bardhi ka ndihmuar gjithashtu në krijimin e ligjit të dekriminalizimit, është pjesë e grupit të juristëve të PD dhe ka qenë në grupin e punës së PD për reformën në drejtësi. (D.D/Shuplaka)
Discussion about this post