Një nga njerëzit më të sulmuar dhe të përfolur këto kohët e fundit, ia delegon veprimtarinë e tij një gruaje.
E kemi fjalën për biznesmenin Klodian Zoto, i cili ende pa filluar punën në incerenatorin e Fierit ka marrë nga Buxheti i Shtetit rreth 5 milionë euro.
Gruaja në fjalë është Denisa Tollkuçi, një emër në fakt aspak i lakuar në bizneset që Zoto posedon por edhe në fushën e biznesit gjithashtu.
Ka qenë Partia Demokratike ajo që ka publikua pak ditë më parë autorizimin e Zotos për Tollkuçin.
“Shoqëria “Integrated Technology Service” shpk, me ortak të vetëm dhe administrator Klodian Zoton, ështe shoqëria ortake e shoqërisë koncesionare për realizimin e inceneratorit të Fierit dhe njëkohësisht të Tiranës.
E megjithë këto kontrata të majme dhe zgjerim veprimtarie në fusha të pashkelura më pare (Zoto përvojë të tijën ka vjedhjen e impulseve telefonike), me një prokurë të përgjithshme ia delegon të gjithë veprimtarinë e tij, si ortak dhe administrator, një zonje, pa lidhje më pare me shoqërinë e tij, të paktën në pamje të pare. Cdo gjë që ka lidhje me shoqërinë, ia ka deleguar këtij personi, madje edhe veprimet me bankat.
Përtej cirkut dhe shkeljes së legjislacionit të shoqërive tregtare, dhe shumë kungujve nën sqetullën e Zotos, shqetësimi ynë lidhet me tepër me piruetën e radhës së Klodianit të Benit, që pritet të shohim”, thotë në një deklaratë zyrtare nga Departamenti i Antikorrupsionit, Aksesit në Shërbime dhe transparencë në PD.
(E.K/FAXWEB)
