Presidenti i Republikës Ilir Meta, ka përzgjedhur kandidaturën e Vitore Tushës, për të marrë postin e Kryetares së Kontrollit të Lartë të Shtetit.
Vitore Tusha është përzgjedhur nga Presidenti mes 34 kandidaturash.
Po kush është Vitore Tusha?
Vitore Tusha ka lindur më 26 nëntor 1960 në Tiranë, ajo u diplomua në vitin 1983 në Fakultetin e Shkencave Politike-Juridike, dega Drejtësi.
Nga viti 1983 deri në vitin 1990 ka ushtruar detyrën e Përmbarueses Gjyqësore në Gjykatën e Rrethit Tiranë dhe më pas deri në vitin 1992 ushtroi profesionin e avokatit.
Në periudhën 1992-1994 ka ushtruar detyrën e gjyqtares në Gjykatën e Rrethit Tiranë dhe në vitet 1994-2001 atë të gjyqtares në Gjykatën e Kasacionit. Në vitet 1999-2001 ka qenë kryetare e Kolegjit Civil të kësaj gjykate.
Në vitin 1997 merr gradën shkencore “Doktor i Shkencave Juridike”. Në vitin 2004 zgjidhet nënkryetare e Dhomës Kombëtare të Avokatisë. Nga viti 1986 e në vazhdim ushtron mësimdhënien si lektore e së Drejtës Civile dhe Procedurës Civile pranë Fakultetit të Drejtësisë dhe Shkollës së Magjistraturës.
Tusha është bashkëautore në hartimin tekstit Procedura Civile, ndërsa ka marrë pjesë me cilësinë e ekspertes ligjore në hartimin e disa projektligjeve. Ajo është emëruar në mars 2008 si anëtare e Gjykatës Kushtetuese.
Vitore Tusha njihet si një nga gjyqtarët që kanë shpallur si jokushtetuese çështje me ndjeshmëri të lartë publike, sikurse marrëveshja e detit, e arritur nga qeveria Berisha.
Veç kësaj Tusha është gjyqtarja që ka shqyrtuar një nga çështjet më të bujshme, atë ndaj ish-kryeministrit Fatos Nano. Në nëntor të vitit 1995, Tusha rrëzoi kërkesën e Nanos, i cili kërkoi lirim të parakohshëm nga burgu pasi ishte dënuar me 12 vite heqje lirie.
CV-ja e Vitore Tushës
(B.B/ Faxweb.al)
Discussion about this post