Paraditen e sotme, kryeministri Edi Rama bëri me dije emrat e katër ministrave të rinj të propozuar në katër ministri. Ata janë: Fatmir Xhafaj, Ogerta Manastirliu, Olta Xhaçka dhe Eduard Shalsi.
Njeriu i reformës në drejtësi, në krye të Ministrisë së Punëve të Brendshme
Njeriu që drejton reformën në drejtësi, Fatmir Xhafaj, është njëri prej zgjedhjeve të kryeministrit Edi Rama, ndryshime që përfshijnë kabinetin qeverisës vetëm tre muaj përpara zgjedhjeve.
Pas dorëheqjes të komentuar së shumti këto dy ditë të Saimir Tahirit nga posti i ministrit të Brendshëm të Drejtësisë, largimi i të cilit është konsideruar si vendim i Ramës që vendosi “ta bëjë kurban” për Metën, është vendosur Fatmir Xhafaj.
I diplomuar për Drejtësi, ai ka shërbyer gjatë karrierës së tij politike si Sekretar i Përgjithshëm i Këshillit të Ministrave, Ministër i Rregullimit të Territorit dhe Turizmit, dhe Ministër i Drejtësisë, Sekretarit për Çështjet e Koordinimit në Partinë Socialiste, Nënkryetar i Komisionit të Përhershëm Parlamentar për Çështjet Ligjore, Administratën Publike dhe të Drejtat e Njeriut.
Lidhur me zhvillimin e reformës në drejtësi, kreu i Komisionit të Ligjeve është shprehur shpesh herë gjatë vitit të kaluar se aleanca nuk po funksionon normalisht. “Nuk po shoh ndonjë marrëdhënie të shëndetshme në këtë fazë”, shprehej Xhafaj në Korrik 2016.
Drejtoresha e QSUT-së në krye të Shëndetësisë
Ogerta Manastirliu, e vlerësuar me çmimin “Bleta e Artë 2015” nga kryeministri është zgjedhur ministre e Shëndetësisë, duke zëvendësuar kështu Ilir Beqajn, i kritikuar së shumti për reformat e ndërmarra në sektorin e shëndetësisë.
Ajo ka mbajtur postin e drejtoreshës së qendrës spitalore “Nënë Tereza” në Tiranë. Manastirliu është cilësuar si një tjetër “Bletë e Artë” në radhën e drejtoreve femra të qeverisë Rama.
Deputetja e PS-së në krye të Mirëqënies Sociale
Ajo është diplomuar për Shkenca Politike dhe Marrëdhënie Ndërkombëtare, Master of Arts (MA), për Administrim Publik nga Clark University, USA. Madje e diplomuar me titull nderi. Xhaçka gjithashtu ka qenë prej vitesh pedagoge e Marrëdhënieve Ndërkombëtare, pranë Universitetit New York Tirana.
Xhaçka është zgjedhur deputete e Partisë Socialiste në dy legjislatura dhe është anëtare e Komisionit për Punën, Çështjet Sociale dhe Shëndetësinë. Në dhjetor të 2016-ës, ajo u rizgjodh për herë të dytë si Kryetare e Forumit të Gruas Socialiste.
Ndërsa në vitin 2006 ka qenë hartuese projektesh për organizata joqeveritare në Amerikë. Xhaçka gjithashtu ka qenë pjesë aktive e shoqërisë civile, kryesisht në fushën e të drejtave të njeriut dhe mirëqeverisjes.
Olta Xhaçka është bashkëshortja e Artan Gaçit, një ndër deputetët e hetuar nga Prokuroria, përkatësisht nga sektori i dekriminalizimit.
Pro importit të plehrave, vendoset në krye të Pushtetit Vendor
Bledi Çuçi do të zëvendësohet nga Eduard Shalsi, një ndër ministrat më të rinj, i propozuar si ministër i Pushtetit Vendor. Ai është deputeti që ishte pro importit të mbetjeve në vend.
Së bashku me Ervin Bushatin dhe Bujar Dervenin, morën nismën për rikthimin e mbetjeve. Nisma e tre deputetëve është justifikuar me mbështetjen për industrinë e riciklimit në vend. “Po i japim oksigjen industrisë së riciklimit”, shprehej Shalsi.
Ai është zgjedhur deputet i Partisë Socialiste në legjislaturën e tetë dhe është kryetar i Komisionit për Veprimtarinë Prodhuese, Tregtinë dhe Mjedisin.
(XH.A/SHUPLAKA)
