Një grup deputetësh të parlamentit holandez kanë mbërritur në Tiranë.
Një mision që pritet të zgjasë dy ditë, do të finalizohet me një raport që do t’i dorëzohet parlamentit holandez.
Kush janë 8 anëtarët e grupit fakt-mbledhës që kanë në dorë dritën jeshile nga Holanda?
Delegacioni drejtohet nga Malik Azmani që i përket partisë për Liri dhe Demokraci ndërsa anëtarë janë Anne Mulder po nga e njëjta parti.
Kees Verhoeven nga partia Demokratët 66, Bram Van Ojik të Gjelbrit e Majtë, Frank Futselaar Partia Socialiste, Stieneke Van der Graaf Unioni Kristian, Mr Pieter Omtzigt partia Kristian Demokrate dhe Jeffrey Van Haaster.
Në një prononcim për mediat, u pa qartë se deputetët holandezë ishin skeptikë për disa çështje, ku nuk harruan të përmendin hetimin për ish-ministrin Saimir Tahiri.
Deputetët thanë se do shohin me vëmendje progresin e 5 prioriteteve të vendosura nga BE, që sipas tyre është i pamjaftueshëm për hapjen e negociatave, si dhe ndëshkimin e politikanëve që kanë shkelur ligjin.
Ditën e nesërme grupi i deputetëve holandezë pritet të zhvillojë takime të tjera me palët politike dhe mediat, për të krijuar një panoramë më të qartë të situatës në Shqipëri.
(F.G/Faxweb.al)
