Mes debatesh të forta në seancë dhe protestës së artistëve, aktivistëve dhe qytetarëve të ndryshëm, Kuvendi miratoi mbrëmë projektligjin që i hap rrugë shembjes së Teatrit Kombëtar.
75 deputetë votuan për shembjen e godinës pavarësisht thirrjeve të artistëve, intelektualëve, dhe qytetarëve të ndryshëm për të mos shkatërruar ‘xhevahirin’ e kulturës shqiptare.
Megjithatë pa kaluar shumë kohë, doli në pah dhe një skandal që e kompromenton votimin. Në listën e deputetëve që kishin votuar për shembjen e teatrit figuronte dhe deputeti Vangjel Tavo, i cili nuk ka marrë fare pjesë në votim pasi nuk ka qenë në sallë, ndaj dikush ka votuar në emrin e tij.
Por kush votoi në vend të Tavos?
Nga lista e bërë publike e deputetëve që votuan, mungon deputeti Robert Bitri. Ai edhe pse ka qenë në sallë dhe ka votuar nuk figuron në listën e 75 deputetëve që dhanë “ok” për shembjen e teatrit. Duhet pasur parasysh se në procesverbalin e fundit të Kuvendit të Shqipërisë rezulton se ka pasur 0 abstenime dhe 0 vota kundër.
Nga ana tjetër, PD dhe LSI i kanë drejtuar një kërkesë kryetarit të Kuvendit Gramoz Ruçi për ta shpallur këtë votim të pavlefshëm pasi kemi të bëjmë me vjedhje votash.
“Ky akt përbën falsifikim të procesit të votimit, si dhe mund të krijojë bindjen se në listë mund të jenë si votues edhe deputetë të tjerë të cilët nuk kanë qenë të pranishëm’,” thuhet ndër të tjera në kërkesën e kryetarëve të grupeve parlamentare të PD dhe LSI.
Mbetet për tu parë nëse Ruçi do ta marrë parasysh kërkesën e opozitës dhe për ta shpallur votimin të pavlefshëm. Por përveç, kësaj falsifikimi i votës brenda tempullit të demokracisë do të ishte dhe rrënimi përfundimtar i kësaj të fundit.
(B.H/Faxweb)
Discussion about this post