Parlamenti miratoi sot me 111 vota pro projektrezolutën “Për miratimin e përkufizimit të përdorshëm për antisemitizmin përcaktuar nga Aleanca Ndërkombëtare për Përkujtimin e Holokaustit”.
Asnjë deputet në sallë nuk ka dalë kundër dhe pas votimit të gjithë kanë duartrokitur.
Të pranishëm në Parlameti ambasadorët e SHBA-së Yuri Kim, BE -së Luigi Soreca, dhe Izraelit, të cilët po ashtu kanë duartrokitur në sallë bashkë me deputetët.
Kreu i grupit parlamentar të PS-së Taulant Balla tha se kjo seancë është një moment krenarie për Kuvendin.
Balla deklaroi se shqiptarët shpëtuan hebrenjtë e Evropës të rrezikuar, të asaj Evrope ku sot kërkojnë të jenë pjesë, ndërsa e cilësoi antisemitizmin pjesë të ADN-së së shqiptarëve dhe kulturës sonë.
“Kjo seancë e sotme bën pjesë në ato momente të krenarisë për kuvendin e shqiptarëve. Ajo që po diskutojmë dhe që pas pak do marrë formën zyrtare të qëndrimit të Kuvendit të Shqipërisë në luftën kundër antisemitizmit besoj se është pjesë e ADN-së sot si popull. Gjatë shekujve ka kaluar pushtime, por ka ruajtur një gjuhë të veçantë dhe një set vlerash të qëndrueshme. Historia e komunitetit të vogël hebre të Shqipërisë ilustron parimet mbi të cilat është ndërtuar kombi ynë. Një prani hebreje në Shqipëri që pas shekullit të 2 të E.S. Shqiptarët shpëtuan hebrenjtë e Evropës, hebrenjtë e rrezikuar. Hebrenjtë qytetarë të Europës, të asaj Europe që duam të bëhemi pjesë”, deklaroi Balla.
