Seanca e sotme në Kuvend ka nisur me një minutë heshtje, në nderim të viktimave që la pas tërmeti i 26 Nëntorit që goditi vendin, dhe la pasoja të shumta në Durrës, Thumanë, Laç dhe në disa zona të tjera të vendit.
Në fjalën e tij, kryeparlamentari Gramoz Ruçi tha se kjo fatkeqësi ishte një mësim edhe për ligjvënësit, pasi duhet që të ketë zgjidhje dhe përshtatje në legjislacion, për tu përballur me çështje që lidhen me mjedisin dhe me natyrën.
“Ky ishte një mësim që ne duhet të nxjerrim për solidaritetin e shqiptarëve kudo që ata ndodhen, si në Shqipëri ashtu dhe në Kosovë, ne ligjvënësit duhet të lexojmë sjelljen e bashkëkombësave tanë. Doja të inkurajoja të gjithë kolegët që janë gjetur pranë qytetarëve në këto ditë.
Doja të përgëzoja punën që ka ndërmarrë qeveria, për të përballuar këtë fatkeqësi, doja të falenderoja opozitën parlamentare dhe jashtëparlamentare që e lanë politikën në këto ditë. Qytetarët presin që të ketë një bashkëpunim të plotë politik, do u bëja thirrje të gjitha palëve që të ndjejmë apelin e 1 mijë të lënduarve, dhe të bashkëpunojmë për të lehtësuar dhimbjen e tyre.
Gjatë këtyre dekadave kemi miratuar kode të tëra ligjesh, por 26 Nëntori duhet të na zgjojë dhe të na kujtojë që jo gjithçka është bërë si duhet, duhen ligje që rregullojnë marrëdhënien tonë me natyrën. Është e pamundur që në pak ditë të formosh një ide të plotë për ligjet tona, duhet një legjislacion i ri dhe i përshtatur me çështje që lidhen me mjedisin dhe natyën.
Kemi mjaft probleme, ne mund të merremi vesh me njëri tjetrin, po a mbështeten ligjet tona mbi pabesitë e natyrës. U kam shkruar dhe në emrin tuaj të gjithë drejtuesve të Kuvendeve në botë, dhe iu kam kërkuar mbështetje financiare, për përballimin e pasojave të tërmetit”, u shpreh Ruçi në fjalën e tij.
