Pas votimit sot në Kuvend të dy anëtarëve të rinj të Gjykatës Kushtetuese, ka reaguar Ambasada Amerikane dhe delegacioni i BE-së, të cilët kanë përshëndetur procesin.
Delegacioni i BE-së shkruan se mirëpresin këtë vendim dhe presin krijimin e një Gjykatë funksionale sa më shpejt që të jetë e mundur.
“Sot Parlamenti shqiptar zgjodhi dy anëtarë të rinj të Gjykatës Kushtetuese. Ne e mirëpresim këtë vendim dhe presim krijimin e një Gjykatë funksionale sa më shpejt që të jetë e mundur. Zbatimi i reformës në drejtësi vazhdon dhe është thelbësor për Shqipërinë në rrugën e saj të integrimit në BE”, thuhet në reagimin e delegacionit të BE-së.
Ndërkohë që edhe Ambasada Amrikane ka mbështetur votimin duke shkruar se “Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike.”
“Prej votimit unanim të reformës në drejtësi në 2016-ën, institucionet shqiptare, përfshirë edhe organet e reja të pavarura të gjyqësorit, kanë punuar fort për të përmbushur vullnetin e popullit. Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike. Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri.”- shkruhet në reagimin e Ambasadës.
