Sipas dokmentit të siguruar dje nga “Shuplaka”, Bashkia e Vlorës i ka dhënë për 2 muaj rresht një shesh publik një partie politike.
Dokumenti në fjalë është përgjigja që i ka kthyer Bashkia e Vlorës Lëvizjes Socialiste për Integrim në kërkesën e saj për të mbajtur takimet e saj elektorale duke i thënë se “sheshi i është dhënë një subjekti tjetër publik”.
“Në përgjigje të kërkesës suaj ju sqarojmë se Bashkia Vlorë me shkresën nr. 3314/1 datë 5.05.2017 i ka dhënë leje një subjekti tjetër për përdorim nga data 01.05.2017 deri më datën 30.06.2017 sheshin para Pallatit të Sportit “Flamurtari” Vlorë për qëllime elektorale. Ju sugjerojmë të bëni kërkesë për përdorim të ndonjë ambjenti tjetër”, – shkruhet në dokumentin që mban firmën e kryebashkiakut Leli.
Po ku ndodhet ky shesh publik në Vlorë?
Sheshi ndodhet përpara Pallatit të Sportit Flamurtari, një shesh ky me një sipërfaqe relativisht të madhe.
Po cilës parti ja dha Leli sheshin publik për fushatë për 2 muaj?!
Në dokument shihet firma e kryebashkiakut të Vlorës, Dritan Lela e që mban datën 7 qershor, lidhur me ngjarjen në fjalë.
Zëvendëskryeministrja Ledina Mandija, e cila është edhe drejtuesja e Task-Force, i kërkoi sot urgjentisht llogari kryetarit të Bashkisë së Vlorës, Dritan Leli, për dhënien me ”koncesion” të sheshit në qytetin e Vlorës.
Konkretisht, Mandija kërkon të dijë se cilës parti i është dhënë sheshi publik për t’u përdorur për dy muaj dhe për llojin e aktivitetit për të cilin është dhënë leja.
“Çfarë praktike është ndjekur në dhënien e lejes? Për cilin subjekt politik është dhënë për përdorim sheshi? Të vihem në dijeni për llojin e aktivitetit për të cilin është dhënë leja?” , janë disa prej pyetjeve që Mandija kërkon sqarim urgjent nga kryetari i Bashkisë së Vlorës, Dritan Leli.
(M.D/Shuplaka)
