“Ky individ nuk meriton as keqardhje”, përplasje në distancë mes Sandër Lleshajt dhe Lulzim Bashës

Lulzim Basha dhe ministri i brendshëm Sandër Lleshaj janë përplasur sot lidhur me kanabizimin e vendit.

Ishte kreu i PD-së ai që deklaroi nga selia blu se Shqipëria vazhdon të thyejë rekorde për kultivimin dhe trafikimin e kanabisit,  akuza që nuk vonoi t’iu përgjigjej ministri Sandër Lleshaj.

Ministri shprehet se me Lulzim Bashën, është një individ që nuk ja vlen të merresh, pasi gjatë mandatit të tij si ministër i Brendshëm në Lazarat lulëzonte kanabisi.

“Nga gropa ku zhytet thellë e më thellë dhe bërtet fort e më fort, Lulzim Basha paska “zbuluar” se ky paska qenë vit rekord i kultivimit të kanabisit!

Ky individ, që në biografinë e tij ka edhe Lazaratin, nuk meriton asnjë keqardhje, por keqardhja për ata që ende e ndjekin pas, rritet dita-ditës.

Ky vit ka konfirmuar çrrënjosjen e kanabisit dhe kthim mbrapa nuk ka më!”, shkruan Lleshaj në reagimin e tij.

(E.K/Faxweb.al)