Përmes një statusi në Facebook, sociologu i njohur Ergys Mertiri ka shpërndarë për ndjekësit e tij një dokumentar të realizuar nga Aulon Kalaja mbi detajet e vrasjes nga policia e shtetit grek 2 vite më parë të të riut nga Shqipëria, Pëllumb Marnikolaj.
Mertiri thotë se Marnikolaj ishte torturuar në mënyrë çnjerëzore në rajonin e policisë, ku ishte detyruar të paraqitej herë pas here, deri në përfundim të një hetimi që po e nxirrte të pafajshëm.
Ai tregon detajet mbi vrasjen e të riut që nga momenti i ndalimit, vrasjes së tij, fshehjes së ngjarjes, tentimit për t’a varrosur 40 km larg Athinës, dhe gjetjes së trupit fare rastësisht nga familjarët në varrezë pak momente përpara se të varrosej, falë ndihmës së dhënë nga një punonjës në morgun e spitalit.
Sipas Mertirit, në ngjarje janë përfshirë strukturat e policisë, avokatë, prokurorë dhe një sërë hallkash të cilat bashkëpunuan në krim.
Nga ana tjetër, sociologu fajëson Ambasadën Shqiptare në Athinë si dhe Ministrinë e Jashtme për mos interesim ndaj çështjes në një kohë kur sipas atij, e gjithë Greqia u ngrit në këmbë për vrasjen e minoritarit grek, i vrarë gjatë një shkëmbimi zjarri me policinë e shtetit shqiptar.
“Ky plehrë shtet është vrasës më i madh dhe më i ndyrë sesa urrejtja racore e policëve grekë,” – shkruan ai.
Sipas Mertirit, vetë grekët u ngritën në protestë kundër shtetit të tyre në rastin e Marnikolajt dhe protesta e organizuar në Athinë, kishte shumë më tepër pjesëmarrës sesa protesta e organizuar në Tiranë për të.
Sociologu i njohur e mbyll shkrimin duke thënë se me sa duket jetën e shqiptarit e vlerësojnë më shumë grekët sesa vetë shqiptarët!
Statusi i plotë i Ergys Mertirit:
Një ngjarje tronditëse e dëshmuar në një dokumentar të guximshëm nga Aulon Kalaja.
I riu Pëllumb Marnikollaj, vritet nga policia greke pas torturave çnjerëzore në rajonin e policisë, ku ishte i detyruar të paraqitej here pas here, deri në përfundim të një hetimit që po e nxirrte të pafajshëm. Më pas i bëhet një autopsi e rreme dhe trupi, pasi mbahet i fshehur në morgun e një spitali dërgohet për t’u varrosur si anonim në një varrezë 40 km larg Athinës.
Familja shqetësohet, shkon të kërkojë djalin, por ndeshet kudo me fshehjen e informacionit, ndërsa të gjithë avokatët tërhiqen nga cështja. Ata arrijnë ta gjejnë trupin në varrezë, pak momente para se të varrosej, fare rastësisht, falë një ndihme të dhënë nga një punonjës në morgun e spitalit.
Në ngjarje janë përfshirë strukturat e policisë, avokatë, prokurorë dhe një sërë hallkash, të cilat bashkëpunojnë në krim, së bashku me Ambasadën Shqiptare në Athinë, e cila, jo vetëm nuk ka vepruar, por ka fshehur ngjarjen duke mos i treguar familjes. Pas skandalit të plasur në media, prokuroria hap dosjen e hetimit, por ka dy vjet që nuk ka lëvizur as gishtin, duke e lënë ngjarjen të harrohet.
Më shumë sesa dramën e tmerrshme të një familjeje, dhe harbutërinë e një shteti fqinj si ai grek, dokumentari tregon sesa i qelbur e i mbaruar është shteti ynë. Ambasada nuk jep asnjë llogari për fshehjen e krimit, duke e lënë familjen edhe pa trupin e të afërmit të vet, ndërkohë që më pas nuk lëviz as gishtin për t’i kërkuar prokurorisë greke informacion mbi hetimet apo të shtyjë institucionet greke të avancojnë në zbardhjen e ngjarjes.
Po të njëjtën gjë bën edhe Ministria e Jashtme. Ndërkohë që e gjithë Greqia u ngrit në këmbë për vrasjen e një minoritari, lindur e rritur në Shqipëri, i vrarë në shkëmbim zjarri me policinë, shteti shqiptar nuk luan as gishtin kur shtetasit e tij vriten në rajonin e policisë, pa kryer asnjë krim.
Ky plehrë shtet është vrasës më i madh dhe më i ndyrë sesa urrejtja racore e policëve grekë. Për tu shënuar është edhe fakti që vetë grekët u ngritën në protestë kundër shtetit të tyre në rastin e Markolajt dhe protesta e organizuar në Athinë, kishte shumë më tepër pjesëmarrës sesa protesta e organizuar në Tiranë për të.
Fatkeqësisht duket se jetën e shqiptarit e vlerësojnë më shumë grekët sesa vetë shqiptarët!
Kush ka zemer te forte, dokumentarin mund ta ndjeke ketu:
(F.GJ/FAXWEB.AL)
Discussion about this post