Ish-deputeti i Partisë Republikane, Ylli Shehu, i cili la Fatmir Mediun për LSI-në, ka dorëzuar këtë të premte formularin e dekriminalizimit në Komisionin Qendror të Zgjedhjeve.
Në sqarimin e tij për marrjen e këtij vendimi Ylli Shehu thotë se do të jetë deputet i LSI-së, dhe vota e tij do të jetë kundër qeverisë Rama.
“Unë do të jem deputet i LSI vota ime do jetë kundër qeverisë, kam marrë vota nga qytetarët dhe skam pse firmos në grup”, është shprehur Shehu.
Një hap të ngjashëm kanë ndjekur edhe Aurora Mara, kandidate po e LSI-së në Qarkun e Dibrës, si dhe Enver Roshi, kandidat i LSI-së në Qarkun e Elbasanit, duke shprehur kështu vullnetin për pranimin e mandatit.
Tri kandidatët e LSI-së pritet të marrin mandatet e lëna nga ish-deputetët LSI-stë në Qarkun e Tiranës, Dibrës dhe Elbasanit, pas vendimit ekstrem politik të opozitës së bashkuar për djegien e mandateve të deputetëve opozitarë.
Ndërkohë në Tiranë është dhe një tjetër kandidate që mund ta pranojë mandatin, Bora Panajoti, e cila është dhe anëtare në Këshillin Bashkiak, dhe një ndër të parat që ofroi mbështetjen e pakursyer në drejtim të Veliajt. Me siguri që nuk do të kishte problem që të mbështeste dhe Ramën në idenë e krijimit të një opozite artificiale në Kuvend.
Rrjedhjet e pritshme nga PD:
Lefter Maliqi, i cili ka garuar në qarkun e Beratit, dhe është i njohur për qëndrimet e tij kontradiktore, dhe për kalimet sa në një krah të politikës në krahun tjetër. Maliqi ka provuar që të garojë me të treja forcat politike: PD, PS dhe LSI, dhe me partinë e drejtuar nga Basha pati një përplasje në zgjedhje, për shkak se u rendit në listën jofituese, duket se tashmë është shansi i tij.
Po ashtu nga PD nuk kanë shprehur derimë tani një qëndrim refuzues as Ligoraq Karamelo në Korçë, Erjon Piciri apo Selami Jenisheri.
(E.K/FAXWEB.AL)
Discussion about this post