Janë zbuluar emrat e tre shqiptarëve të arrestuar dhe atij në kërkim, mes 14 pjesëtareve të një grupi ndërkombëtar të trafikut të kokainës në lëkura kafshësh të zbuluar në Greqi.
Mësohet se shqiptarët e arrestuar, janë identifikuar si Robert Muci, 41 vjeç nga Shushica e Vlorës, Skender Kallashi, 50 vjeç nga Novosela e Vlorës dhe Ledvis Hoxha, 27 vjeç nga Kutallia e Dimalit. “Koka” që fshihej pas transportit të lëkurave me kokainë nga Amerika Latine në Greqi konsiderohet një shtetas 45-vjeçar shqiptar, i identifikuar si Luis Murataj (Karteri) i cili nuk u arrestua, por mësohet se jeton në Spanjë.
11 persona u arrestuan nga policia në operacion, 6 grekë, 3 shqiptarë, 1 kolumbian dhe 1 bolivian.
Operacioni i policisë greke
Operacion i forcave speciale çoi në zbulimin e një laboratori të prodhimit të kokainës në një depo dhe në një banesë.
Në depo ishte ngritur një laborator ku kryhej ndarja e kokainës që ishte zhytur në lëkurë të papërpunuar me kimikate, ku disa nga të dyshuarit u kapën duke fjetur.
Sipas raportimeve nga mediat greke, mësohet se importi i lëkurave nga Bolivia në Greqi, me procedura ligjore, ishte kryer prillin e kaluar.
Pastaj paletat me lëkurat e kafshëve u transferuan në depon që karteli kishte marrë me qira në Pikermi, ku dhe u gjetën afërsisht 300 kilogramë tretës kimikë që përdoreshin për të nxjerrë kokainën, nga kripërat me të cilat ishin zhytur lëkurat e thata të papërpunuara të lopëve.
Laboratori i paligjshëm u gjet se përmbante afërsisht 100 kilogramë kokainë të përzier me kripëra, të cilat ishin nxjerrë nga 200 lëkura.
Nga 1.500 lëkurat e mbetura të gjetura në paleta, sasia që grupi do të kishte prodhuar, pas ndarjes nga kripërat, vlerësohet të ketë qenë afërsisht 700 kilogramë.
“Lëkurat u importuan në vendin tonë nëpërmjet një kompanie me shumicë për mallra lëkure dhe mallra udhëtimi, të cilën e kishin krijuar vetë dhe u transportuan me automjete tregtare në një vend ku kishin instaluar një laborator të posaçëm kimik”, tha zëdhënësja e shtypit e policisë greke, Constantia Dimoglidou.
