Gjykata e Lartë ka vendosur “të ngrijë” të drejtën e familjes Cali në Kurbin për të shfrytëzuar Lagunën e Patokut për peshkim. Deri më tani e drejta e shfrytëzimit vijon të jetë në favor të familjes së ish-deputetit Armando Prenga.
Përballja gjyqësore mes dy familjeve mbi të drejtën e shfrytëzimit të kësaj lagune është edhe fillesa e konfliktit edhe sherrit mes dy fiseve. Më datën 4 shtatorit 2015 u zhvillua një sherr me përplasje të dhunshme me armë para Komisariatit të Kurbinit.
Familja Cali ka fituar të drejtën e shfrytëzimit të lagunës në Shkallën e Parë dhe në Apelin Administrativ, por Gjykata e Lartë ka pezulluar ekzekutimin e këtij vendimi.
Burime pranë kësaj Gjykate konfirmuan se një Kolegj ka vendosur pezullimin e ekzekutimit të vendimit të Apelit Administrativ. Ky pezullim do të zgjasë deri në përfundim të shqyrtimit të rekursit të bërë nga pala humbëse vendimit të Apelit në Gjykatën e Lartë. Në lidhje me këtë çështje, Gjykata e Shkallës së Parë dhe Apeli Administrativ kanë pranuar më herët padinë e familje Cali kundër Ministrisë së Bujqësisë, shkruan një portal online.
Dy shkallët e para të Administratives kanë shfuqizuar procedurën e ndjekur nga ministria për përzgjedhjen e shoqërisë së vëllait të Prengës, si shoqëri fituese të tenderit të zhvilluar për të drejtën e shfrytëzimit të Lagunës së Patokut. Pamundësia për të shfrytëzuar lagunën u pranua dje edhe nga Gjergj Cali, i pranishëm në Gjykatën e Lartë, për llogari të gjykimit ndaj ish-deputetit Prenga. Ai pretendoi se laguna po shfrytëzohej nga disa pukjanë, nën hijen e ish-deputetit.
“Me një vendim të dytë, pezullim ekzekutimi, na kanë komunikuar se nuk keni leje ta përdorni. Aty e përdorin do pukjanë nën hijen e Armando Prengës. Armandi e ka fituar tenderin, jo na”, tha Gjergj Cali, pas përfundimit të seancës. (J.V/Shuplaka)
Discussion about this post