Pas Partisë Demokratike, edhe Lëvizja Socialiste për Integrim ka kallëzuar pranë Prokurorisë se Posaçme zyrtarë të Partisë Socialiste.
Kallëzimi është depozituar nga Sekretari i Përgjithshëm i LSI, Endrit Braimllari, i cili akuzon se zyrtarët e PS-së kanë shpërdoruar detyrën në funksion të fushatës elektorale.
Sipas LSI, zyrtarë të lartë të PS janë angazhuar në aktivitete elektorale edhe pse KQZ parashikon se diçka e tillë është e ndaluar.
Mes personave të kallëzuar nga LSI janë: Edi Rama, Arben Ahmetaj, Erion Veliaj, Bujar Cela, Xhemal Qefalia, Toni Gogu, Elton Arbana, Adrian Tufa dhe Besnik Bali, të cilët sipas kësaj force politike kanë shpërdoruar detyrën.
Ky është kallëzimi i dytë që mbërrin në SPAK për zyrtarët e PS-së, pas atij të javës së kaluar që u depozitua nga Partia Demokratike, po për të njëjtën akuzë. Marrëveshja e 5 Qershorit parashikonte që 4 muaj përpara zgjedhjeve, zyrtarëve të lartë u ndaloheshin takimet elektorale, apo inagurimet që mund të përdoren politikisht.
(E.K/Faxweb.al)
