Deputetët e thërritën në interpelancë për Teatrin, Rama i hábit të gjithë: Nuk kam çfarë them më

Kryeministri Edi Rama ka nisur fjalën e tij në Kuvend, teksa ka refuzuar ti përgjigjet të gjitha pyetjeve të bëra nga deputetët e opozitës me në krye Rudina Hajdarin. Rama e nisi fjalimin e tij duke rikthyer në vëmendje atë që kanë thënë aktorët për Teatrin, duke nënvlerësuar në këtë mënyrë pyetjet e deputetëve.

“Unë për Teatrin e kam thënë qëndrimin tim dhe nuk kam më fjalë. Kur e nisën protestën për Teatrin, as unë dhe as ata të tjerët që janë kthyer në bij të lënduar të Molierit dhe Shekspirit, jo vetëm nuk ishin aty por u kishin thënë që të mos dukeshin. Në krye të asaj proteste nuk ishin dy Budinat por ishte Robert Ndrenika dhe Arben Derhemi”, tha Rama, ndërkohë që më pas nisi të lexonte me radhë artistët.

Në fjalën e saj Hajdari tha se Rama e ka pasion shkatërrimin dhe betonizimin e Tiranës, ndërsa kërkoi që të dinte sesi ka qenë zinxhiri i urdhërave për prishjen e godinës së TK.

Pjesë nga fjala e Hajdarit: Nisa në fakt datën e 17 Majit duke lexuar titujt e gazetave më prestigjoze në botë, Le Monde thoshte se kryeministri shqiptar kishte shembur Teatrin Kombëtar dhe njerëzit kishin dalë në rrugë, Reuters thoshte se njerëzit u trajtuan si barbar. Është një botë e parë zoti klryeministër që po sheh fytyrën tuaj të vërtetë, atë barbare, ju keni pasur një fiksim me atë truall, se nëse do të ishte Teatri në një vend tjetër, Teatri do të ishte në këmbë.

Me imagjinatën tuaj po bëni një Tiranë me kulla të bukura, që do të zhvillojnë Tiranën, nuk jemi ne këtu që e dimë se apartamentet në ato kulla nuk është në gjendje që ti blejë askush. Më vjen keq që edhe njëherë ju zoti kryeministër abuzoni me postin tuaj. Ka pasur njerëz në atë godinë dhe ju prapë e keni shkatërruar, nuk keni pyetur as për artistët dhe as për njerëzit.

Si ishte zinxhiri i urdhërave zoti kryeministër, kush ishin përgjegjësit, do vini këtu e do thoni që u ngjaj atyre të tjerëve, do merreni dhe me leksikën e gramatikën time, por duhet të vini këtu e të thoni se çfarë i keni bërë Tiranës,. Betonizimi i Tiranës është fakt, kullat janë fakt, rrafshimi i historisë është fakt, je kthyer në një Nikolla Gruevski, që shkatërroi qendrën e Shkupit, dhe do të keni të njëjtin fat me të. (E.K/Faxweb.al)