Një shpërthim i dyshuar me lëndë plasëse raportohet të ketë ndodhur gjatë natës në Ishull Shëngjin, në Lezhë, duke cituar banorët e zonës, raportohet se shpërthimi ka ndodhur në një servis makinash, në pronësi të Klaudio Mëhilli.
Per pasojë mësohet se ka pasur dëme materiale, xhama të thyer të servisit ashtu sikur edhe të një automjeti që ishte i parkuar në oborrin e biznesit në fjalë.
Vetë Mëhilli, në një intervistë për Fax News është shprehur se shpërthimi ka qenë mjaft i fuqishëm, dhe ka trembur të gjithë familjen, që ishte në gjumë në momentin e ngjarjes.
Banesa ndodhet në katin e dytë të godinës, ku gjendet edhe servisi, ndërkohë që Mëhilli deklaron se nuk ka probleme me askënd, dhe pret që drejtësia të zbardhë sa më shpejt ngjarjen dhe të identifikojë autorët.
“Nga ora 12 e gjys jena tremb edhe kaq, ndodheshim në shtëpi duke fjetur, jemi çuar të gjithë si familje. Se kena prit, se skemi probleme me kërrkënd, nuk kam fare dyshime. Fare. Është tremb vajza fort, fëmijë i vogël, normal. Kërkoj të zgjidhet gjithçka, ta di të paktën se prej kujt më ka ardhur”, është shprehur Mëhilli.
