Këshilli i Lartë Gjyqësor ka pezulluar zyrtarisht nga detyra si gjyqtare e Gjykatës së Apelit të Korçës, gjyqtaren Mimoza Margjeka, e cila zyrtarisht është proceduar penalisht për korrupsion pasiv nga Gjykata e Posaçme. Të gjithë anëtarët e KLGJ votuan pro pezullimit të gjyqtares.
Vetë Margjeka i ka mohuar ákuzat e ngritura ndaj saj për kòrrupsion dhe është shprehur se i gjithë procesi është i montuar për shkak se ajo është e vetmja gjyqtare që vendosi të mos njohë zgjedhjet lokale të 30 Qershorit që u mbajtën vitin e kaluar.
Së bashku me Margjekën është vënë në pranga dhe bashkëshorti i saj, për të cilin është dhënë masa e arrestit me burg, ndërkohë që gjyqtarja është lënë nën masën e arrestit të shtëpisë, për shkak të fëmijës së saj të mitur.
“Shtetasit Nejton Bali, Klaudjo Zhilla dhe Skënder Demiraj (me profesion avokat), në bashkëpunim me njëri tjetrin, kanë konsumuar veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë”, parashikuar nga neni 319 e 25 i Kodit Penal, duke i dhënë shtetases Mimoza Margjeka, me detyrë gjyqtare, aktualisht e komanduar në Gjykatën e Apelit Korçë, nëpërmjet bashkëshortit të saj, shtetasit Arben Cara, një shumë prej 6.000 (gjashtë mijë) eurosh, si përfitim të paligjshëm.
Kjo shumë parash, është dhënë me qëllim ndryshimin e masës së sigurimit, nga “arrest në burg” në “garanci pasurore”, ndaj shtetasit Orion Bali, i arrestuar nga Prokuroria pranë Gjykatës së Shkallës së Parë Pogradec, për veprën penale “Ndihmë për kalim të paligjshëm të kufijve”, parashikuar nga neni 298/3 i Kodit Penal. Në shkëmbim të përfitimit të paligjshëm ka rezultuar se Gjykata e Apelit Korçë ka ndryshuar masën e sigurimit nga “arrest në burg” në “garanci pasurore”, për këtë shtetas”, thuhej në njoftimin e SPAK teksa njoftoheshin masat e arrestit.
(E.K/Faxweb.al)
Discussion about this post