Meta jep zgjidhjen e papritur: Të vijë Rexhep Mejdani në vendin tim, unë do të dal në garë

Presidenti Ilir Meta ka paralajmëruar dorëheqjen nga posti presidencial nëse palët politike dhe institucionet shtetërore nuk zbatojnë dekretin e tij për mbajtjen e zgjedhjeve në 13 tetor, çka do të rëndonte dhe më tej krizën politike në vend.

Meta ka nënvizuar gjithashtu në konferencën për shtyp se do të rikthehet në garën politike, edhe në zgjedhjet e 13 tetorit duke propozuar dhe Rexhep Mejdanin si pasues të tij në Presidencën e Shqipërisë.

“Unë s’kam patur iluzione, që Shqipëria do organizojë zgjedhje daneze, kjo është çështje që kërkon kulturë tjetër.

Presidenti do japë shembullin personal, nëse s’do bëjmë zgjedhje në 13 tetor, do bëjnë zgjedhje Presidenciale.

Presidenti është dhe më i hapur, nuk ka frikë nga vota e shqiptarëve, që në rast se do kryeministri të lerë dhe detyrën e Presidentit, gjithmonë duke konkurruar në 13 tetor, por me një kusht që në këtë zyrë të vij një person me shumë integritet dhe që ka qenë në këtë zyrë dhe që ka provuar që mbrojtja e interesit kombëtar, pra të jetë profesor Rexhep Meidani“, tha ai.

Presidenti Meta në Konferencë për shtyp këmbënguli sërish se zgjedhjet e lira do të jenë guri i fundit i Shqipërisë për të marrë një përgjigje pozitive nga BE për çeljen e negociatave ndaj ai ka ftuar kryeministrin Edi Rama të reflektojë dhe të mendojë për zgjedhjet lokale të datës 13 tetor të dekretuar prej tij.

Gjithashtu Presidenti Meta ka këshilluar KQZ-në të nisë punën për organizimin e zgjedhjeve në këtë datë dhe të mos bjerë në paligjshmëri.

Gjithashtu ai u ka bërë apel dhe palëve politike të marrin pjesë në këto zgjedhje për të mos vonuar më ecjen e Shqipërisë para në integrimin evropian.

“Mos realizimi i zgjedhjeve ne 13 tetor, do të jetë kosto serioze në pikëpamjen ligjore, por është penalizmi i sigurtë, 101 % për çeljen e negociatave të Shqipërie në tetor.

Qytetarët kanë të drejtë të zgjedhin, jo të votojnë dhe kjo është detyrim që u takon të gjithëve.

Po kështu qeveria e konsideron normale, unë nuk i kam kërkuar as kryeministrit që të japë dorëheqjen, pavarësisht se kjo është kërkuar nga opozita“. tha Presidenti.