Kryeministri Edi Rama ka reaguar pas akuzave të kreut të PD-së Lulzim Basha, se numri i vdêkjeve si pasojë e Covid në vendin tonë, është më i lartë se ai që raportohet nga ana e Ministrisë së Shëndetësisë.
Në postimin e tij, Rama shprehet se lidhur me këtë akuzë, që sipas tij ka kaluar çdo limit, do u përgjigjet me një mesazh të drejtpërdrejtë qytetarëve gjatë ditës së nesërme.
Ndërkohë në vijim të propagandës, që nuk është ndalur në asnjë çast të vetëm që nga nisja e pandemisë, Rama ka postuar dhe videon e Najada Çomos dhe mjekëve të Infektivit, të cilët thanë se akuzat e Bashës po godisnin punën dhe përpjekjet e tyre heroike.
Edhe pse Basha nuk fajësoi në asnjë rast mjekët dhe punën e tyre, ata e gjetën me vend, që të mblidheshin herët mëngjesin e sotëm, dhe të bënin një videomesazh, njësoj si të ishin vartës të Ministrisë së Shëndetësisë.
Postimi i plotë i Ramës:
Për akuzën e pashembullt të Lulëzim Bashës, e cila cënon drejtëpërdrejtë integritetin moral e profesional të mjekëve të vijës së zjarrit dhe nxit dhunë ndaj tyre, do t’u drejtohem nesër shqiptarëve me një mesazh të drejtëpërdrejtë, sepse këtu është shkuar shumë shumë larg, përtej çdo caku të politikës së ulët ditore dhe këtu nuk është më fjala thjeshtë për llafet e një aktori të papërgjegjshëm!
Sot u shpreh të gjithë solidaritetin dhe mbështetjen time, profesoreshë Najada Çomos e të gjithë skuadrës së saj shembullore, duke u përulur me mirënjohje përpara stërmundimit të tyre të përditshëm prej nëntë muajsh me radhë, si edhe duke u thënë që historia e mjekësisë shqiptare do të flasë për ta kur Lulëzim Bashës e xhagajdurëve të tjerë të botës mizerabël të shpifjeve e të thashethemeve, t’u jetë harruar emri, nami e nishani!
(E.K/Faxweb.al)
Discussion about this post