Ccështja e ish-prokurores Rovena Gashi, e cila kërkon rikthimin e saj në detyrë, po diskutohet paraditen e sotme në Kolegjin e Pavarur të Kualifikimit. Ish-prokurorja po përfaqësohet në këtë seancë nga motra e saj Ema Gashi, ndërsa edhe vetë është e pranishme.
Gashi u shkarkua nga detyra nga KPK, për shkak të problemeve me pasurinë e saj.
Nga ana tjetër ajo ka qenë në një betejë të vazhdueshme me kryeprokuroren aktuale Arta Marku, e cila e uli në detyrë Gashin dhe bashkëshortin e saj prokuror Dritan Gina.
“Të gjitha këto veprime në kaq pak kohë dhe të qënurit “e përkohshme” tregojnë qartë se zonja Marku është shumë e ngarkuar me hakmarrjen primitive dhe e orkestruar nga urdhëruesit e saj për të larguar nga prokuroria çdo person që nuk ka lidhje me ata që e emëruan në atë detyrë”, shkruante Gashi në kohën kur e larguan nga detyra.
Vendimi për shkarkimin e Gashit nga detyra u mor nga anëtarët e KPK Genta Tafa, Pamela Qirko dhe Lulzim Hamitaj, në 25 Korrik të vitit 2018/
Rovena Gashi e ka filluar karrierën në Prokurori në vitin 2004. Ajo ka punuar si prokurore në Tiranë nga viti 2004 deri në vitin 2013, kur u emërua në krye të Drejtorisë së Marrëdhënieve Juridiksionale me Jashtë në Prokurorinë e Përgjithshme.
Gashi e mbajti këtë detyrë deri në fund të dhjetorit 2017, kur kryeprokurorja e re Arta Marku e uli në detyrë. Ndërsa në maj 2018, Prokuroria regjistroi procedimin penal ndaj saj dhe bashkëshortit Dritan Gina, të cilët po hetohen për pasurinë e tyre, ndërkohë që Marku i pezulloi të dy nga detyra.
(E.K/FAXWEB.AL)