Saimir Tahiri mbërrin tek Krimet e Rënda, sot lexohet pretenca për dënimin

Ish-ministri Brendshëm Saimir Tahiri ka mbërritur ditën e sotme në Gjykatën e Krimeve të Rënda, pasi Prokuroria pritet të lexoje pretencën dhe të kërkojë masën e dënimit për te dhe ish drejtorin e Policisë së Vlorës, Jaeld Çela.

Ish ministri Tahiri dhe i pandehuri Jaeld Çela akuzohen për 3 vepra penale, atë të “Trafikut të lëndëve narkotike”, “Kryerjes së veprave penale nga organizata kriminale” dhe “Grup i strukturuar kriminal”.

Tahiri dhe Jaeld Çela po gjykohen me procedurën e shkurtuar, cka do të thotë se provat e akuzës nuk do të merren në shqyrtim gjyqësor dhe në rast dënimi, ata do të përfitojnë ulje të tij në 1/3-ën.

Në seancën e fundit, e cila u zhvillua në datën 22 Korrik, ish ministri Tahiri kërkoi me insistim që pretenca për të, të jepej para pushimeve të muajit Gusht, po kjo kërkesë nuk u morr parasysh nga trupa gjykuese e krimeve të rënda. Tahiri pyeti gazetarët, nëse njësoj si ai ishin të lodhur nga zgjatja për më shumë se dy viteve e hetimeve.

“U bënë dy vjet, edhe shtyrja është e tepërt, me pretendimin se është para Gushtit që janë pushimet për mua është e tepërt. Unë kërkoja që vendimi të jepej tani, ju nuk u lodhët dy vite me këtë histori? Unë jam i gatshëm që të bëj mbrojtjen time në çdo sekond, pse prokuroria nuk është e gatshmë që të bëj punën e saj?”,u shpreh Tahiri pas daljes nga seanca.

Më tej ish-ministri tha se në bindjen e tij, Prokuroria nuk ka shtuar asnjë provë kundër tij. I pyetur nga gazetarët nëse do të kalonte provimin në vjeshtë, Tahiri me të qeshura tha se ai nuk kishte ngelur, por ishte prokuroria që kishte ngelur në klasë.

“Pas dy viteve unë shoh që Prokuroria nuk ka shtuar asnjë gërmë më shumë, nga ajo që unë kam parë në muajin Shtator. Shyqyr që u gjetën dokumentat, çtë them unë, të uroj prokurorinë që gjeti dokumentet, dhe do ti duhet që ti përkthejë prapë për shkak se i kanë humbur.

Kur ndodh kjo me mua, merreni e mend se çfarë ndodh me njerëzit, që nuk kanë mundësi të dëgjohen. Nuk shkova unë në vjeshtë, shkoi prokuroria, unë nuk jam mësuar që të shkoj në vjeshtë. Historia e vendit tonë ka nisur me burra me mustaqe dhe ka përfunduar me burra me botoks”, tha më tej ish-ministri.