Mazhoranca tërhiqet nga shkarkimi i Ilir Metës. Në raportin final të hartuar nga relatorja për PS, Klotilda Bushka specifikohet se presidenti Meta ka kryer shkelje, por që nuk janë shkak për shkarkim.
Ditën e sotme, Komisioni Hetimor i ngritur për shkarkimin e Presidentit Meta pas përplasjes Presidencë-Mazhorancë në lidhje me zgjedhjet e 30 qershorit dhe emërimin e anëtarëvë të Gjykatës Kushtetuese, pritet të dalë me një raport final mbi gjetjet e kryera nga ky komision.
Ndërsa e para ka referuar relatorja për mazhorancën Klotilda Bushka ajo ka deklaruar se ky komision ka gjetur shkelje nga ana e Presidentit të Republikës Ilir Meta i cili me veprimin apo mosveprimin e tij ka cënuar Kushtetutën dhe disa ligje të shtetit shqiptar, por që nuk janë shkak për shkarkimin e tij.
“Nuk gjetëm shkelje të mjaftueshme për të shkarkuar presidentin Ilir Meta. Shkelje ka pasur por nuk sollën pasojë përveç disa konflikteve në vend. Në gjykimin tonë shkeljet nuk justifikojnë shkarkimin. Në lidhje me zgjedhjet e 30 qershorit, kemi konstatuar se presidenti ka vetëm një detyrë: vetëm caktimin dhe jo anulimin. Kjo kompetencë ushtrohet vetëm një herë sipas nenit 92 pika gj dhe nenit 94 të Kushtetutës si dhe Kodit Zgjedhor.
Në lidhje me shfuqizimin e dekretit për datën e zgjedhjeve vendore është analizuar gjithë praktika dhe është vënë në dispozicion dhe arsyetimi nga Presidenca por sipas gjetjeve ato nuk justifkojnë një shtyrje dhe nuk ka bazë ligjore.
Me shtyrjen dhe anulimin e zgjedhjeve është shkelur e drejta për të zgjedhur, anulimi dhe moscaktimit i një date e shkel këtë parim dhe të drejtë”, u shpreh relatorja Bushka.
Gjithashtu ajo i është referuar dhe opinionit të Komisionit të Venecias ku saktësohet se ‘këto shkelje sollën vetëm situata tensioni në vend’.
Ndërkohë relatorja Klotilda Bushka theksoi dhe faktin se: “KQZ mundi të realizojë zgjedhje për anëtarë të kryetarëve të Bashkive. Janë zgjedhje që u realizuan me vota në nivel vendor dhe në lidhje me Komisionin e Venecias, bojkoti i partive politike nuk mund të justifikojë mosmbajtjen e zgjedhjeve”.
Në raportin prej 48 faqesh mazhoranca nuk ka ngurruar ‘ti tërheqë veshin’ Presidentit duke i kujtuar atij se:
“Presidenti është përfaqësues i unitetit kombëtar dhe nuk duhet të mbajë anë. Në këtë kuadër, e gjithë kjo analizë e kryer është në kadër të këtij hetimi si shkelje e partimit të unitetit të popullit. Pra sic e ka thënë dhe Venecia, nëse partitë nuk duan të marrin pjesë, kjo nuk është një arsye për të mos mbajtur zgjedhjet”.
Ndërkohë në lidhje me përplasjen e Kuvend-Presidencë mbi emërimet në Gjykatën Kushtetuese raporti final i Komisionit Hetimor specifikon se:
“Presidenti nuk ka ushtruar në mënyrë të pavarur të drejtën e tij duke i dërguar një shkresë kuvendit dhe Këshillit të Emërimeve në Drejtësi ka ndërprerë afatin 30 ditor për emërimin dhe ka zgjedhur 2 anëtarë dhe jashtë afatit. Të gjitha këto veprime të kryera nga Presidenti i Republikës përbëjnë shkak për të shkarkuar presidentin.
Komisioni hetimor ka marrë në analizë të gjithë dokumentacionin përkatës dhe kemi arritur në konkluzionin se për këto çështje, referencë duhet bërë në opinionin e Komisionit të Venecias ku ka konkluzione që ndihmojnë Komisionin Hetimor për pasojat e veprimeve të Presidentit për të kuptuar nëse jemi para një shkelje të rëndë ose jo”, u shpreh Bushka e cila duke iu referuar opinionit te Komisionit te Venecias mbi 2 çeshtjet mbi të cilat u ngrit ky komision hetimor çon në tërheqjen e legjislativit nga shkarkimi i Ilir Metes nga detyra e Presidentit të Republikës së Shqipërisë. (Faxweb.al)
