Një person i dënuar me 25-vite burg për vrasje është ekstraduar pasditen e sotme nga shteti grek. Sipas njoftimit të policisë bëhet me dije se ndaj Fatos Metushi, 53 vjeç, rëndonte akuza për “vrasje me paramendim”, pasi që në vitin 1997 në fshatin Boçovë, Fier ka vrarë me armë zjarri shtetasin S.A..
Vendimi për “vrasje me paramendim” ndaj Metushit u dha nga Gjykata e Rrethit Gjyqësor Fier që në vitin 2000, ndërsa sot Interpol Tirana ka bërë të mundur ekstradimin e tij.
Njoftimi i plotë i policisë:
Ekstradohet nga Greqia një shtetas i dënuar me 25 vite burg për vrasje
Falë bashkëpunimt të Interpol Tirana me Interpol Athinën, u krye ekstradimi nga Athina/Greqi drejt vendit tonë të shtetasit Fatos Metushi, 53 vjeç, lindur në Boçovë, Fier.
Shtetasi Fatos Metushi, ishte i shpallur në kërkim pasi Gjykata e Rrethit Gjyqësor Fier, me vendimin penal të datës 23.02.2000, e ka dënuar me 25 vjet burgim për veprën penale “Vrasje me paramendim”, parashikuar nga neni 78 i Kodit Penal.
Përmbledhje e ngjarjes së ndodhur:
Shtetasi Fatos Metushi në vitin 1997 në fshatin Boçovë, Fier ka vrarë me armë zjarri shtetasin S. A.
Si rezultat i bashkëpunimit të Interpol Tiranës me Interpol Athinë/Greqi, u bë i mundur arrestimi i tij në Greqi, duke u finalizuar me ekstradimin drejt vendit tonë.
