Vijon operacioni policor i koduar “Parku”. Policia ka vënë në pranga një 21 vjeçar duke e çuar numrin total të të arrestuarve në 13.
Ditën e djeshme, Policia e Tiranës njoftoi se në kuadër të këtij operacioni ka arrestuar 12 persona dhe ka shpallur në kërkim 6 të tjerë.
Në vijim të hetimeve është arrestuar në Dhërmi shtetasi R. D., pasi ka rezultuar se ishte i implikuar në këtë veprimtari kriminale.
Shtetasit e arrestuar dhe ata të shpallur në kërkim merreshin me shitjen dhe shpërndarjen e lëndëve narkotike në zonën e ish-Parkut, në rrugën “Ndre Mjeda” dhe “Frosina Plaku”. Gjatë një periudhë njëvjeçare sipas policisë janë sekuestruar sasi me lëndë narkotike dhe shuma të ardhura nga shitja e lëndëve narkotike.
Njoftimi i policisë:
Tiranë
Vijon operacioni policor i koduar “Parku”.
Shkon në 13 numri i të ndaluarve.
Kapet dhe vihet në pranga 1 shtetas i shpallur në kërkim në vijim të këtij operacioni.
Në vijim të operacionit policor të koduar “Parku”, për goditjen e veprimtarisë kriminale në fushën e lëndëve narkotike, finalizuar një ditë më parë nga Komisariati i Policisë Nr. 2, në bashkëpunim me DVP Tiranë dhe Forcën e Posaçme Operacionale në DPPSH, nën drejtimin e Prokurorisë, si rezultat i të cilit u vunë në pranga 12 shtetas, ka vijuar puna me hetime të thelluara për kapjen e personave të tjerë të implikuar në këtë veprimtari kriminale.
Në vijim të hetimeve është shpallur në kërkim edhe shtetasi R. D., pasi ka rezultuar se ishte i implikuar në këtë veprimtari kriminale.
Ne vijim të operacionit, nga shërbimet e Policisë Kufitare Dhërmi, në koordinim me shërbimet e Komisariatit të Policisë Nr.2 Tiranë, u bë i mundur lokalizimi dhe kapja në Dhërmi, e shtetasit R. D.
Në zbatim të vendimit të Gjykatës, e cila i ka caktuar masën e sigurimit “Arrest në burg”, për veprën penale “Prodhimi dhe shitja e narkotikëve”, u bë ndalimi i shtetasit R. D., 21 vjeç.
Ky shtetas, në bashkëpunim me personat e tjerë të arrestuar, merrej me veprimtarinë kriminale të shpërndarjes së lëndëve narkotike.
Materialet i kaluan Prokurorisë së Rrethit Gjyqësor Tiranë, për veprime të mëtejshme.
(E.H/Faxweb.al)
