Ermir Lenajni ka lënë grumbullimin në Kombëtare para ndeshjes me Skocinë për Nations League dhe miqësoren ndaj Uellsit. Këmbë majti ka patur probleme dëmtimi që në momentin që erdhi në grumbullim.
Ditën e djeshme 29-vjeçari kreu një seancë stërvitore të diferencuar për të parë gjendjen pas dëmtimit dhe stafi mjekësor vendosi që të mos e rrezikojë më tej prishtinaliun prandaj ai u rikthye në Zvicër, te Sioni.
Probleme duket se ka edhe Eros Grezda, i cili është stërvitur veçmas dhe nuk dihet nëse do të jetë në gjendje të luajë ndaj Skocisë.
Lenjani ishte ndër lojtarët që ka luajtur më shumë me skuadrën e tij dhe kishte arritur formë optimale duke shënuar gola dhe asistuar për shokët te Sioni. Edhe Grezda shkëlqeu këtë fundjavë me Rangers, sulmuesi shënoi dopjetë në ndeshjen e tij të parë që luajti për 90 minuta në kampionatin skocez.
Ndërkohë Migjen Basha ka kryer një seancë stërvitore më të lehtë se të tjerët duke qenë se të hënë u aktivizua me skuadrën e Aris në kampionatin grek. Gjithsesi mesfushori nuk do të jetë ndaj Skocisë për plotësimin e numrit të kartonave, por do të jetë i gatshëm për Panucci-n në miqësoren ndaj Uellsit.
Loret Sadiku ishte lojtari i parë që nuk u grumbullua, më pas ishte Ylber Ramadani që pësoi një frakturë në krah dhe më pas Ivan Balliu që nuk u la i lirë nga klubi i Metz, tashmë i shtohet edhe mungesa e Lenjanit.
Ndërsa Basha e Hysaj nuk mund të luajnë ndaj Skocisë për shkak kartonash. Një sërë mungesash për trajenrin Pranucci, i cili duhet të ribëjë edhe një herë llogaritë me lojtarët që ka në dispozicion.
