Në pritje të dy ndeshjeve të fundit në grup, me Spanjën dhe Italinë, vijnë lajme të mira për kombëtaren shqiptare.
Me referendumin për pavarësinë e Katalonjës dhe dëmtimet e iberikasive dhe “axurrëve” duket se kombëtarja jonë do të ketë më pak telashe.
SPANJA
Pas lajmeve të këqija për sulmuesin Alvaro Morata, Spanja ka humbur edhe mbrojtësin e djathtë titullar Dani Karvahal, por edhe Andres Iniestën me shumë mundësi.
Futbollisti i Realit të Madridit vuan nga një virus që i ka shkaktuar edhe probleme me zemrën. Atij nuk i rekomandohen sforcime fizike, ndaj lojtarit do t’i duhet të qëndrojë për disa javë pushim, për një kurim të plotë.
Nga ana tjetër edhe mesfushori dhe kapiteni i Barcelonës, ka lënë fushën e lojës, dje ndaj Las Palmasit, në minutën e 84-t dhe duke prekur kofshën e djathtë.
Ditën e sotme, stafi mjekësor i kombëtares dhe trajneri Julen Lopetegui do të vendosin sot si për Iniestën, ashtu sikurse edhe për Moratën.
Nga ana tjetër, referendum për pavarësinë e Katalonjës nga Spanja ka sjellë telashe të tjera, pasi futbollistët e Barcelonës mund të largohen nga kombëtarja spanjolle. Gerard Pique ishte i pari që deklaroi publikisht se ishte gati të linte skuadrën për Katalonjën, ndërkohë që përflitet se edhe Leonel Messi dhe të tjerët mund të bëjnë të njëjtën gjë.
ITALIA
Po ashtu edhe Italia po humb pjesë të rëndësishme së fundmi. Dje, sulmuesi kryesor i “axurrëve”, Andrea Beloti, ka lënë fushën e lojës me barrelë dhe nuk do të jetë ndaj Shqipërisë në ndeshjen e datës 9 tetor, në Shkodër.
FRANCA
Por edhe nga Franca nuk vijnë lajme të mira për trajnerin e Xhampiero Ventura, sepse përveç sulmuesit të Torinos, një problem muskulor do të frenojë edhe fantazistin e PSG-së, Marko Verrati, që t’i bashkohet grumbullimit sot në Koverçiano. Në vend të Belotit dhe Verratit, Ventura ka thirrur sulmuesin e Kievos, Roberto Ingleze dhe mesfushorin e Kaljarit, Nikolo Barrela.
