Anas al-Basha, vetëm 24 vjeç, ishte njeriu që mes ferrit të qyteteve siriane, bënte fëmijët të qeshnin. I maskuar si një klloun, pavarësisht shkatërrimit të shkaktuar nga sulmet me bombë, ai përpiqej tu rikthente të vegjëlve buzëqeshjen si mënyrë për tu lehtësuar traumat.
Ai ndërroi jetë ditën e martë si pasojë e një sulmi me bombë në Aleppo, qytetin sirian që BE e cilëson si “varrezë të hapur”. “Associated Press” raportoi se i riu ndërroi jetë si pasojë e një bombe në pjesën lindore të qytetit, ku trupat e Assad-it kishin fituar më tepër terren gjatë ditëve të fundit. I riu, mësohet se ka qenë pjesë e “Space for Hope” që ndërmerrte një sërë iniciativash për fëmijët dhe jo vetëm.
Ai vendosi të qëndronte në Aleppo, pavarësisht rrezikut dhe largimit të prindërve të tij nga qyteti. Anas nuk u largua, donte të qëndronte pavarësisht pagës së vogël, vetëm e vetëm për t’i bërë fëmijët të qeshnin. Mësohet se 24-vjeçari ishte martuar vetëm disa muaj më parë dhe së bashku me bashkëshorten po qëndronin në Aleppo-n lindore, të bllokuar për shkak të sulmeve me bombë.
Discussion about this post