Largimi i Fatmir Xhafës ishte vendosur muaj më parë? Gazetari: Çfarë më thanë deputetët e PS-së

Dorëheqja e papritur e Ministrit të Brendshëm Fatmir Xhafaj ka shkaktuar debat dhe aludime të ndryshme mbi arsyen që  e çuan atë drejt këtij vendimi.

Xhafa u largua në një moment delikat pak ditë pas operacionit të madh ku u arrestuan emra të njohur të botës së krimit por edhe dy ish-deputetë të PS-së, ndërsa opozita akuzonte se ishte grisur fletë-arresti për Vangjush Dakon, duke bërë që në opinionin publik të qarkullojnë hipoteza se pikërisht ikja e tij ka të bëjë me këtë çështje.

Por gazetari Erl Murati u shpreh në emisionin “Opinion” se shkarkimi i Xhafës mund të jetë vendosur që në maj. Ai tha se deputetë të PS-së i kishin thënë që Rama do ta shkarkonte Xhafën në shtator.

Sipas Muratit, Xhafa, ka marrë koston e skandalit që shpërtheu në muajin maj e që lidhej me audiopërgjimin e vëllait të tij.

“Që në muajin maj deputet në Partinë Socialiste thoshin off records që do të ndërrohej  në shtator. Nuk mund ta hiqte që në maj sepse i jepte kosto Partisë Socialiste, pasi ishte në kulmin e akuzave të opozitës”,tha Murati, duke shtuar se arsyet për shkarkimin e tij thuhej të ishte çështja “Babale”.

(B.H/Faxweb)