Ben Blushi komentoi sot ndryshimet që po ndodhin në qeveri në emisionin “E diell”, të Adi Krastës. “Largimi i Saimir Tahirit ka qenë kushti i Ilir Metës ndaj Ramës, për vazhdimin e koalicionit dhe lëvizjet në qeveri janë tentativa e kryeministrit për të plotësuar dëshirën e aleatit të tij”, tha Blushi.
Ai tha gjithashtu se ministrat e tjerë që po hiqen, janë një tentativë për të fshehur arsyen e vërtetë të largimit të ministrit të brendshëm. Blushi sulmoi sërish Ramën duke e akuzuar për mungesë të përgjegjësisë publike.
“Nuk e kuptoj se si mund të hiqen disa ministra njëkohësisht, vetëm për t’i kaluar në shërbim të partisë. Ku është përgjegjësia publike e qeverisë dhe e ministrave? Si mund të largohen ata nga detyrat publike, për t’u vënë në shërbim të partisë?”, deklaroi Blushi.
Blushi komentoi edhe protestën e opozitës dhe mundësinë për të arritur një kompromis.
“Nuk besoj se do të ketë marrëveshje midis qeverisë dhe opozitës, por besoj se opozita mund të hyjë në zgjedhje për arsyen e vetme, atë të mos humburit të kontrollit të opozitës”, tha ai.
Blushi ngacmoi edhe kreun e kuvendit, duke thënë: “Ilir Meta është gardiani që ruan me fanatizëm sistemin e kalbur politik të ndërtuar në Shqipëri. Meta kujdeset që ky sistem të rezistojë e të mos shembet, sepse rrënimi i sistemit do të thotë edhe rrënim i asaj çka ai ka krijuar”, tha kreu i LIBRA.
(M.D/ Shuplaka)
Discussion about this post