Gjykata e Tiranës ka dënuar me 100 mijë lekë gjobë të pandehurin Redi H., si autor të vjedhjes me anë të mashtrimit të telefonit të një vajze që ai kishte njohur në Facebook.
Sipas vendimit të gjykatës vajza është njohur në rrjetin social me të pandehurin Redi H.
Me datën 03.02.2017, rreth orës 22:00, i pandehuri e ka ftuar vajzën për kafe. Vajza ka pranuar ftesën dhe ka shkuar e shoqëruar nga një mikeshë e saj, raporton Panorama.
Ata janë takuar të tre dhe pasi kanë biseduar për pak minuta, i pandehuri Redi H. i ka kërkuar të dëmtuarës telefonin e saj, me preteksin se do të telefononte dhe bisedonte me nënën e tij, që e kishte lënë të sëmurë.
Ai ka pohuar se telefoni i tij i kishte humbur atë ditë. E dëmtuara i ka dhënë telefonin të pandehurit, i cili duke folur në telefon ka dalë jashtë lokalit.
Ajo ka vënë re se ai ishte larguar duke i marrë dhe telefonin dhe pa i thënë asaj që po largohej. Kur nuk e ka parë të pandehurin rrotull lokalit, e dëmtuara ka telefonuar në numrin e saj përmes telefonit të mikeshës. Pas thirrjeve telefonike të kryera me telefonin e shoqes së saj, e dëmtuara ka dalluar faktin nëse telefoni i saj ishte i fikur. Ajo është përpjekur ta kontaktojë në facebook të pandehurin, por nuk ka marrë përgjigje prej tij. Ajo i është drejtuar policisë ku ka kallëzuar të pandehurin për vjedhjen me anë të mashtrimit të telefonit. (M.D/Shuplaka)
Discussion about this post