Një ditë pasi akuzoi Partinë Socialiste për përdorimin e policisë kundër LSI-së, Ministri i Mjedisit Lefter Koka ka folur sërish duke komentuar punën e aleatëve të tij në qeverisje.
Nga Xhafzotaj në Bashkinë e Shijakut ku kishte shkuar për të shpërndarë lejet e legalizimit Koka preku çështjen e investimeve në infrastrukturë, në disa bashki të Shqipërisë.
Kjo ka ndodhur sipas tij, në një kohë kur njerëzit nuk kanë as kushtet më bazike.
Sipas Kokës, fasada e bukur nuk mjafton kur kushtet bazike mungojnë.
Këtu ai përfshiu edhe Bashkinë e Durrësit ndërsa kërkoi në të njejtën kohë më shumë vëmendje nga qeveria për Bashkinë e Shijakut
“Nuk mundesh dot në një shtëpi që të blesh televizor me ngjyra kur nuk ke gjera bazike. Fatkeqësisht kjo ka ndodhur në disa qytete të Shqipërisë dhe padyshim edhe në Bashkinë e Durrësit. Ne sigurisht e duam qytetin të bukur, e duam edhe fasadën e bukur. Por që të kemi fasadë të bukur duhet të kemi një ambient ku fëmijët të shkojnë dhe sic e thashë më parë të ushtrojnë atë që Zoti u ka falur, fëmijërinë etyrë”-ka thënë Koka. (A.H/Shuplaka.com)
