Pas mosmarrveshjeve disamujore, koalicioni qeverisës u bashkua sot në Sukth ku ALUIZNI Durrës shpërndau 4-mijë leje legalizimi.
Ilir Meta, Lefter Koka dhe Vangjush Dako shtrënguan duart në takimin e zhvilluar.
Kreu i Kuvendit pasi përgëzoi qeverinë për arritjen e objektivit me legalizimet, thumboi aleatët duke u kërkuar qytetarëve të falenderonin edhe partinë socialiste.
“Kjo është një zonë e jashtëzakonshme dhe këto prona kanë një vlerë të jashtëzakonshme, dhe për shkak të zonës ku jeni. Një zonë pranë bregdetit, një zonë pranë akseve kryesore të zhvillimit të vendit dhe absolutisht që legalizimi i jep një dimension tjetër, një vlerë tjetër pronave tuaja” tha Meta.
Dako dhe Koka e morën fjalën njëri pas tjetrit.
“Jemi në momentin që të gjithë ju po legalizoheni dhe për këtë dua të falenderoj qeverinë shqiptare, Kryetarin e Kuvendit dhe mazhorancën e cila ka qenë e përkushtuar për të zgjidhur këtë problem kaq të madh të banorëve të Sukthit” u shpreh Dako.
Ndërsa Koka tha se legalizimi është një punë e vështirë dhe se është jetik po ashtu.
“Ajo që kemi kërkuar dhe ju kërkojmë në vazhdimësi, jo vetëm në këtë sektor por në të gjithë sektorët, bashkëpuimi vjen më mirëbesim dhe mirëkuptim. Kjo është një punë e vështirë dhe pa pjesëmarrjen tuaj aktive, pa gjetur një mirëkuptim të përbashkët nuk do të mundemi dot të mbarojmë këto procese kaq të rëndësishme dhe kaq jetike” tha ministri i Mjedisit Koka. (M.D/ Shuplaka)
