Kandidati i LSI-së për zgjedhjet e 25 qershorit, Klevi Pojana ka komentuar largimin e Metës nga kreu i lëvizjes ku ai bën pjesë dhe zëvendësimin e tij nga Vasili.
I pyetur ndër të tjera gjatë intervistës për gazetën “Shekulli” se si e sheh këtë largim dhe a është ndjerë ndonjë dallim sa i përket drejtimit të forcës politike ku bën pjesë, ai është shprehur se ky zëvendësim ka qenë më shumë një zhurmë mediatike se sa një problem për LSI-në.
Sipas Klevi Pojanës, “kjo ishte një zgjedhje e detyrueshme për Ilir Metën, ndaj kjo lëvizje i ngjan “një mirupafshim dhe jo një lamtumire”.
“Për të thënë të drejtën më shumë kjo ka qenë një zhurmë mediatike se sa nje problem për strukturat dhe simpatizantët e LSI-së. Pikësëpari nisur nga fakti që kjo ishte një zgjedhje e detyrueshme për Ilir Metën nisur nga situata e agravuar politike ku ndodhej vendi, por dhe nga fakti se kjo është një lëvizje që i ngjan një mirupafshim dhe jo një lamtumire. Ilir Meta do të jetë një President i shkëlqyer, sepse mbi të gjitha është një shtetar i rrallë, po kështu edhe Petrit Vasili do ta kryejë në përsosmëri detyrën e kryetarit të LSI-së, sepse ka mbështetjen e çdo anëtari dhe simpatizanti. Ne i besojmë eksperiencës dhe profesionalizmit të tij. Në gjykimin tim ai është kandidatura më serioze për kryeministër, pas zgjedhjeve të 25 Qershorit, sigurisht pasi LSI të triumfojë si forcë e parë.”, është shprehur Pojana, i gjashti në listën për Tiranën.
(XH.A/SHUPLAKA)
Discussion about this post