Libri i Dr.Çilit dhe i vonuari i vërtetë

Nga Arbër Zaimi

Shoh në lajme se Dr. Henri Çili paska nxjerrë një libër sot, ku lëvdon Ramën si “reformist” dhe akuzon kritikuesit e Ramës si “kundërreformistë” (kaq është kapaciteti i metaforës historike ëeberiane të Dr. Çilit).

Rama – thotë Dr. Çili – erdhi në pushtet në 2013 me një program populist regresiv e të majtë, por befasisht në qeverisjen e tij ai u tregua “third-ëay” dhe lejoi të qeverisin “vlerat liberale”.

Dr. Henri Çili këtu më në fund pajtohet me mua, që kam thënë gjithnjë se Edi Rama është neoliberali më efikas që ka Shqipëria, dhe pjesë e efikasitetit të tij është edhe fakti se ndërkohë që “reformon” si djathtist, përsërit si debil klishenë “se ne jemi të majtë”.

Të njëjtën gjë bëjnë marionetat e Ramës.

Fakti që Dr. Çili autor librash dhe pedagog e kuptoi këtë gjë kaq vonë tregon se i vonuari i vërtetë në këtë mesele është Dr. Çili.

Nga ana tjetër Z. Çili, biznesmen e pronar këtë punë e ka kuptuar qëmoti, kur bashkë me biznesmenë të tjerë, si psh. Z. Frangaj, Z. Mane etj. e “harruan” PD-në dhe shkuan te PS-ja.

Nuk iu desh të bënin asnjë kapërcim ylberi, sepse ylberin vetë e kish kapërcyer PS-ja që e uli kokën gjithë qejf në prehrin e tyre.

Rama nuk ndikohet nga Dr. Çili ideollog neoliberal, sepse Dr. Çilin ideollog neoliberal nuk e dëgjon as Z. Çili biznesmen oportunist me synime oligopoliste.

Rama e të tijtë ndikohen prej, madje punojnë vetëm për oligarkët ndërtimtarë, të cilëve përveçse ua hap sferën publike që të investojnë e të fitojnë privatisht (përmes PPP-ve si maskë për privatizimin dhe banalizimin e hapësirës publike), duke favorizuar arsimin dhe mjekësinë private – u mundëson dhe hapje të vazhdueshme të mundësive për ndërtim, në formën e tenderimit, koncesionimit dhe lejes private.

Ndërtim në qytete, rrugë e bregdet.

Kaq është “ekonomia” liberale e Ramës, PPP, arsim e mjekësi private dhe investim ndërtimor i quajtur rrejshëm infrastrukturë, urbanizëm apo projekt turistik.

Dr. Çili nuk ia dikton rrugën Ramës, ai vetëm konstaton me kënaqësi, ndërkohë që Z. Çili fërkon duart. Rruga e Ramës është e lehtë, atë nuk ka kush ta pengojë.

Rrofshin reformat (neo)liberale, rroftë majtizmi sa për sy e faqe, rroftë rehatia. Të hapen tregjet! Vivan las cadenas!

Arbër Zaimi