Në një takim tjetër që kryetari i LSI-së në Durrës, Lefter Koka, ka zhvilluar në këtë qytet, nuk ka ngurruar të lëshojë thumba në drejtim të “forcave politike tradicionale”, siç shprehet ai.
Koka ngre shqetësimin e emërimeve të të kandidatëve nga qyteteve të ndryshme për tu bërë deputetë në të tjerë qytete, konkretisht në Durrës.
Ai shprehet se duhet që deputetët të jenë njerëz që jetojnë së bashku me komunitetin nga ata zgjidhen.
“Unë nuk e di nëse dikush nga ju në katër vite, ka mundur të takojë një deputet të cilin e votoi në 2013, ndarja në sistem proporcional ka bërë që liderat politikë të emërojnë njerëz në politikë dhe jo të zgjedhin. Nëse je përfaqësues i një force të madhe politike, të atyre dy forcave tradicionale politike, sot mund të emërohesh dhe mund të jesh nga cilido qytet i Shqipërisë, mund të caktohesh në një qytet tjetër, të zgjidhesh deputet dhe të kesh vetëm një muaj punë me qytetin që të voton. Ajo që ne kemi kërkuar, sepse në fund fare nuk është vetëm ligji ai që dikton sot njerëzit, është dhe morali. Ne kemi në listën tonë ata që janë banorë të Durrësit, Krujës, Manzës të Shijakut, të rinj dhe të reja që janë pjesë e kësaj force politike. Janë të rinj që aspirojnë , kanë dhënë një kotribut të jashtëzakonshëm në këtë forcë politike, dhe unë do dëshiroja shumë të mernim besimin tuaj, të marim besimin tuaj sepse janë të rinj që premtojnë”, tha Lefter Koka.
Më tej, ai ngriti shqetësimin se rreth 1000 familje në Durrës , në Bashkinë e vjetër të Durrësit, janë familje që jetojnë me ndihmë sociale, prej 60 mijë të vjetrash, diçka që për një familje është një lëmoshë:
“Do të ishte më dinjitoze që të bëheshin politika të atilla që këta njerëz të integroheshin dhe të punonin për të patur një pagë minimale për të jetuar.”
(XH.A/SHUPLAKA)
Discussion about this post