Gjykata e Gjirokastrës la në burg anëtarët e ashtuquajtur “Banda e Shijakut”, të cilët janë autorët e grabitjes me dhunë të 12 milionë lekëve tre ditë më parë në fshatin Memaliaj. Seanca gjyqësore u drejtua nga Mirela Ilijopulli, e cila fillimisht i dha fjalën prokurorit Julijan Çafka.
Ky i fundit paraqiti prova dhe argumente se Erald Allushi 23 vjec, Fatjon Resuli dhe Armando Reka, të tre nga Shijaku, janë autorë të grabitjes me dhunë të 12 milionë lekëve në fshatin Memaliaj. Vetë të akuzuarit kanë heshtur në momentin e dhënies së provave nga ana e prokurorit Çafka, ndërkohë që kishin pranuar që në momentin e parë para oficerëve të Policisë Gjyqësore autorësinë e kësaj ngjarjeje.
Avokatët e të akuzuarve kanë kërkuar gjykim të shkurtuar pasi klientët e tyre pranuan autorësinë. Ndërkaq prokurori i çështjes kërkoi burg pa afat për të tre, si dhe për Migel Shabanin i shpallur në kërkim.
Ky i fundit sipas dëshmive nga të arrestuarit, ka qenë organizatori i grabitjes së 12 milionë lekëve ku i ka orientuar anëtarët e “Bandës së Shijakut”. Gjykatësja në fund ka vendosur masën e arrestit “Burg pa afat” për të tre të rinjtë si dhe për Migel Shabanin që vlerësohet të jetë organizatori i grabitjes.
Discussion about this post