Ministri i Mirëqenies Sociale, Blendi Klosi, ka bërë sot të ditur se do të negoicohet lidhur me ligjin e ri që Senati italian pritet të miratojë për call center-at. Së bashku me ministren e Ekonomisë, Milva Ekonomi, ai zhvilloi një takim me përfaqësues të disa kompanive call center në Shqipëri, të cilëve u siguroi se do të negociohet që ligji i ri të ketë sa më pak ndikim të Shqipëri.
“Kërkojmë që të ketë sa më pak ndikim. Do dëgjojmë zërin tuaj, kjo punë duhet të marrë zgjidhje”, ka thënë Ministri.
Klosi u siguroi përfaqësuesve se qeveria e mbështet aksionin e mbi 800 call center-ave dhe shtoi se Shqipëria ka ndryshuar tashmë statusin e saj në Bashkimin Europian. Edhe ministrja e Ekonomisë shprehu gatishmërinë për një qëndrim të përbashkët. Miratimi i ligjit nga Senati italian rrezikon më shumë se 25,000 vende pune në Shqipëri. Në rast se ai miratohet por nuk zbatohet, parashikohen sanksione administrative deri në 150.000 euro.
