Një ditë më parë, senati italian miratoi buxhetin e 2017-ës, që përfshin edhe ligjin për Call Center-at që janë në Shqipëri. Një çështje mjaft e diskutuar së fundmi për shkak se rrezikon rreth 25,000 vende pune.
Lidhur me këtë shqetësim, kryetari i Shoqatës së Call Center-ave në Shqipëri, Gentian Drenova, shprehet për “GSH” se një pjesë e konsiderueshme të të punësuarve do të largohen nga puna.
Ai shprehet se impakti nuk do të jetë i menjëhershëm, fillimisht do të ketë forcim të rregullave ndjekur nga shtrëngime.
“Nuk mendoj se do të ketë mbyllje Call-Center-ash. Mbyllje do ketë, besoj, te ato që janë më të vegjël, ndërsa do të shohim çfarë reagimi do të kenë Call-Center-at multinacionale që janë edhe më të penalizuarat. E sigurt është që nuk do të ketë mbyllje, por reduktim pune. Ky reduktim, pa dyshim, nënkupton se nuk do të ketë rritje punonjësish, por mund të ketë një fluks nga një Call-Center te tjetri.”, shprehet Drenova rreth “emigrimit” që pritet të ndodhë brendapërbrenda tregut.
I pyetur nëse përpjekjet e qeverisë shqiptare ishin të mjaftueshme për mosmiratimin e ligjit, kryetari i shoqatës shprehet se ishin të pamjaftueshme pasi u kujtuan shumë vonë: “Me gjithë përpjekjet e tyre dhe për shkak të rënies së qeverisë “Renzi”, ku ishte shpresa jonë, ranë të gjitha përtokë.”
