Vazhdon të godasë me deklaratat e saj gruaja e djalit të Enver Hoxhës, Liliana Hoxha.
Së fundi në një intervistë ajoështë shprehur për arrestimin e djalit të kunatit Ermal Hoxha, i cili u arrestua si pjesë e një grupi trafiku të kokainës.
“U ndjemë të turpëruar. Po të ishte djali im, unë do ta kisha dënuar publikisht” , thotë ajo.
Lidhur me dokumentet e deklasifikuara së fundmi të CIA-s, që flasin për një vdekje natyrale të Enver Hoxhës, zonja Hoxha hedh poshtë këtë pretendim.
“Sa të jetë gjallë Nexhmije Hoxha, do të luftojë armiqtë që nuk i mundi dot gjatë komunizmit. Sa të jetë gjallë Nexhmije Hoxha, do të manipulojë median nga brenda e nga jashtë, për të mbrojtur në mënyrë alibike figurën e saj të cenuar nga akuzat që i bëhen. Në shkurt ajo bën 97 vjeç, ndërkaq që ka rinisur fushatën e radhës, edhe pse vendi është i përmbytur. Më rëndon shumë që po reagoj sot, kur nuk i jam përgjigjur asnjë sulmi të saj pas botimit të librave të mi. Por gjoja prononcimi i CIA-s për vdekjen natyrale të Enver Hoxhës, çështje për të cilën kemi qenë të kërcënuar që në 1990 për të mos e kundërshtuar, vajtje-ardhjet e Ilirit në Serbi, në kohën që djalin e ka në burg për aktivitet droge, pra edhe pse dihet nga i madh e i vogël që si qytetare është e mbytur moralisht deri në grykë, megjithatë ushtron nëpërmjet medias po atë dhunë arrogance e terrori psikologjik ndaj shqiptarëve si gjatë komunizmit e deri sot”, shprehet ajo ndër të tjera në një intervistë për ‘’Panorama”.
Për të, Nexhmije Hoxha dhe Ramiz Alia ishin agjentë të UDB-së jugosllave që gjatë kohës së Zogut, ndërsa qëllimi ishte që të merrnin drejtimin e pushtetit në Shqipëri.
(E.K/FAXWEB)
