Marrëveshja për demarkacionin me Malin e Zi nesër do të jetë në duart e deputetëve. Kuvendi i Kosovës ka njoftuar se kjo marrëveshje do të shqyrtohet nga Komisioni për Punë të Jashtme diasporë dhe investime strategjike. Zëvendëskryeministri Fatmir Limaj ka paralajmëruar se kësaj teme do t’i vie epilogu përfundimtar në muajin janar.
“Ne po punojmë që kur të dërgohet në parlament të Kosovës të gjithë t’i duartrokasin variantit që do ta dërgojmë. Të duartrokitet nga qytetarët por edhe nga miqtë tanë dhe përfundimisht ta përmbyllim këtë temë. Ne po punojmë në këtë drejtim duke respektuar interesat e dy vendeve. Nga ky proces ju siguroj se asnjëri vend nuk del i humbur, përkundrazi”, tha Limaj për Tribuna Channel.
Ndërkohë analistët vazhdimisht kanë vlerësuar se çështja e demarkacionit me Malin e Zi mund të përplas koalicionin qeverisës pa përjashtuar edhe rrëzimin e qeverisë.
Për ratifikim të demarkacionit thirrje vijnë edhe nga Shtetet e Bashkuara të Amerikës dhe Bashkimi Europian.
Demarkacioni është një nga çështjet më të vështira me të cilën është përballur Kosova. BE e ka vënë si kusht ratifikimin e kësaj marrëveshje për liberalizimin e vizave.
Kryeministri Haradinaj është një nga kundërshtarët e versionit aktual të dhënimit të vijës kufitare, ndërsa është shprehur se kësaj çështje do të gjendet zgjidhja.(B.H/Faxweb)
